سەرگوروشتەی واڵا
دەربارەی سەردەمی عوسمانی وتراوە
از کتاب:
زەبری هۆنراوە
اثر:
کامران مکری (1929-1986)
3 دقیقه
871 مشاهده
خونچەی وشەی بە نمی ئۆخەی پاراو
زەردەخەنەی گەرمتر لە خۆرەتاو
لەناو باخی لێوی دایکا ئەو ساتە
کە دوا بەندی چاوەنواڕی و ئاواتە
لەو کاتەدا جگەرگۆشەی دوور کەوتووی
دێتەوە لای دڵی بە چراوگ بووی
ئەم خونچەیە بە بای بەکام گەیشتن
ئەبێ بە گوڵ ورد ورد دێتە شنەشن
لەم خونچەیە جوانتر نێرگزی کاڵە
کە بە تەنیا جێگای لێوی مناڵە
نێرگزەکەی وشەی نازداری دایە
لەسەر لێوی سەد هەزار ورشەی تیایە
مەم لە زین بوون بلبل لە گوڵاڵەی گەش
نابێ بەوەی مناڵ دوور بێ لە باوەش
هەرچی گوڵە بێبەری بن لە شەماڵ
بەژان نییە وەکوو بێ دایکیی مناڵ
بە خۆری ناز خونچەی گەشی کۆرپەی کۆش
ئەبێ بە گوڵ لەسەر چڵی نەغمەی خۆش
***
وەک هوزاری ترساو لە سایەی پەرژین
کە ئەنواڕێ بۆ ئاسۆ و ئاسمانی شین
وە یا کەوی مەڵاسی نەپێکراو
وڕی زیخی جێ فیشەکی ناشیی ڕاو
بەو وێنەیە مناڵێکی بەسزمان
ئەنواڕییە بنمیچ و تەژەی سەربان
لەپشت چمکی کراسا مەڵاسن و کز
ئەیترووکان جووتێ چاوی وەک نێرگز
تەپلەقووچی، سمێڵ زلی سەرسنگ پڕ
لە واڵای ورد، پارچە ئاڵتوونی خڕخڕ
دەستی نایە سەر تەنگەی زل سەر پشتێن
هەردوو پێی جووت دانی ڕیچ وەک تۆڵەسێن
لە شەخەڵی ڕووی گرژا ڕەشەبای دەنگ
کە هەڵیکرد وەک تەپڵ و کەەڕەنای جەنگ
کچی ناسک مناڵی خرپن و جوان
هاتەوە یەک لە ترسا وەک ژێ و کەوان
وەکوو کەو چوو خزایە پێچی داوێن
تەپلەقووچیش چاوی سوور بوو وەکوو خوێن
ڕووی کردە ژن، وتی: ئەی ژنی ڕسوا
لە کوێت هێنا و لە کوێت بوو مناڵی وا
ژن ڕووی کردە مێردی پەروەردەی تاوان
وتی بۆچی؟ مناڵێکە بێ باوان
زۆر عەزرەتیم بۆ ئەوەی بم بە دایک
تۆش دڵسۆز بە بۆ ئەم کچە وەک باوک
تەپلە بەسەر! پەلەماری دایە شیر
مناڵەکەش بۆی دەرچوو هەر وەکوو تیر
باخە و باخ و بنچک بە بنچک گشتی
گەڕا تا دی وەکوو نێچیرێ کوشتی
بەدەما کەوت وەک کەوتنی کاتی دڕک
خوێنی ڕژا بۆ ناو پەڵاش و تووتڕک
شیری سڕی نایەوە ناو کێلانی
سەرنجی دا لە ئەستێرە و نیشانی
نواڕییە دوور لووتکەی چیای کوردستان
هەردوو پێی جووت سنگی زیاتر دەرپەڕان
وتی: کورد بوو بۆیە کوشتم چاکم کرد
سەربەرزییە کوشتنی مناڵی کورد
سا تەپلەقووچ بگرە گوللە و ناو دەمت
من خوێن ئەکەم بە لاجانگ و پەرچەمت
بە یەک دەسڕێژ زرم دام لە بن چنگی
لە ناوی دەم لە نیشانەی سەر سنگی