ئیمشەو دیارەن دەردم کارییەن
از کتاب:
ئەو شیعرانەی دراونەتە پاڵ مەولەوی
اثر:
مولوی (1806-1882)
1 دقیقه
626 مشاهده
ئیمشەو دیارەن دەردم کارییەن
هووناو جە زامم چون سەیل جارییەن
ئاوازەی مەینەت نە دەروون سەد تەرز
چون چلچەنگ وە چەنگ خەمان بیەن بەرز
بێ هۆشی جە هۆش، کەم فامی جە فام
وە هەزار مەقام مەدەران جە فام
سا نەیچی دەخیل، بێ دێر و درەنگ
موتریب فیدات بام دەس بدەر وە چەنگ
کەف بدەر ئەو دەف، پەنجەت نە ڕووی نەی
بە وێنەی باربود جە بەزم ئارای کەی
نەکیسا ئاسا دەس دەر وە سەمتوور
دەف و نەی و چەنگ باوەر وە حوزوور
چلچەنگ وە سەر چەنگ لێدەر دەرقەرار
وە هەزار دەستان بنوازەم ئەمجار
وێت بە حەقیقەت مەست بکەر جە مەی
سازان بسازە پەی واوەیلا و وەی
کەف بدەر وە دەف، چنگ بدەر وە نەی
هیچ مەواچە کەی، تۆ خودا سا دەی
بەو ئاواز بەرز خاس بکەر ڕازان
بە عەشق ئازیز نازک ئەندازان
جۆش دەر وە ناڵەم، کۆڵ دەر وە دەردم
هۆش دەر وە خەمان، گۆش دەر وە فەردم
ئازیز بێ خەبەر، مەینەت با خەبەر
چەنی ڕۆ مەیۆ الله اكبرعربی