یادی «مەحموود پاشای جاف»
از کتاب:
دیوانی پیرەمێرد
اثر:
پیرمرد (1867-1950)
2 دقیقه
728 مشاهده
وادەی خێڵە و خوار ئێلی جافانەن
دەمی گەرمەسیر دەشتی شیروانەن
لە براکانم کەسیان نییەن یار
وەک جاران سوار بن بۆ ڕاو و شکار
هانا، برایان شوێن نادیارم ڕۆ
سێ پڵنگ هەیبەت شێر شکارم ڕۆ
سێ شاهین، سێ باز شیروانی ماوا
فەلەک لە زۆریان کەوتبووە داوا
ئای سلێمان بەگ عەداڵەت پیشە
لە دێوی کێوی قاف بێ ئەندیشە
ئەو شۆڕەسوارە زینەتی زینە
ئەو حاتەم هیممەت سەرحەدنشینە
چابوک سواری بە ناو و داو بوو
لە شیروانەدا هات هاتی ڕاو بوو
ئێستا نادیار سەر ڕووی بیساتە
لە دوای ئەو عەشرەت ڕووی لە نەهاتە
هێجگار فەتاح بەگ ئەو ڕۆستەم ڕەنگە
ئەو پیلەتەنەی شێوە نەهەنگە
ئەو شاباز هیممەت ئەو هەڵۆ قینە
ئەو شان و باهو ئەو سەهمگینە
سەرتاپا بڵند وێنەی فەرامورز
ئەهاتە لەرزە لە نەعرەی ئەلبورز
ئەوی تیا نییە دەشتی شیروانە
بۆیە لە لای من چۆڵ و وێرانە
ئاخ بۆ قادربەگ دۆستی مەولەوی
گەردنکەچی بوون شێری سەر زەوی
هەر ئەو زانیویە شینی بۆ بکا
هەر بەیتێک جامێک فرمێسک لە تەکا
خانمان خەریک شین و هاوارە
داخی فەتاح بەگ لەسەر گشت بارە
ئاخ لاڵ بم لە کوێن شۆڕە سوارانیان
بێدەنگ و ئاهەنگ گەلی یارانیان
بەو خوایە فەلەک گەر برای ئەمرد
بە ناڵە دنیای هەراسان ئەکرد
دەستی نەئەچوو بە مەرگی جوانمان
وێران نەدەبوو جێی خان و مانمان
خۆی کەسی نییە و جەرگی بێ ئێشە
مەرگی مەردانی کردووە بە پیشە