بەرز و بڵندە هێندە دەرەجەی خاکەکەی وەتەن
از کتاب:
دیوانی پیرەمێرد
اثر:
پیرمرد (1867-1950)
2 دقیقه
1249 مشاهده
بەرز و بڵندە هێندە دەرەجەی خاکەکەی وەتەن
هێشتا بەهاری ئێمە نەهات، سەوز نەبوو چەمەن
چوارلا بەهارە، بەزمە، سەدای ساز و زیلەیە
لای ئێمە هەر شەستە، سەر بە کڵاوە و ڕەهێڵەیە
نیسان بەهاری ئێمەیە وا چاوەڕێین کە بێ
هەر قەترەیەکی گەوهەرە تەرزەی لەگەڵ نەبێ
زستان گەلێک بەزوقم و هەڵا بوو ئەمانەوێ
پاداشی ئەو هەڵایە بەهارێکی دەرکەوێ
هەر گۆشەیەکی خاکی وەتەن بێتە گوڵشەنێ
هەوری بەهار بگری، چەمەن شاد بێ، پێبکەنێ
سەر هەر چڵێک گوڵێ، بە نەوایەکی بلبلێ
بەزمێکی جەم بێ، بادە وەکوو کانی هەڵقوڵێ
هەر بێشەیەکی پڕ لە هەژیر و شێر
بۆ ڕۆژی ئیحتیاجی وەتەن جانفیدا و دلێر
مژدەی بەهاری پێیە شکۆفەی نیهالی گوڵ
وەک ئایەتی ژیانەوە ئومێد ئەدا بە دڵ
ئەمشەو گوڵی ئومێدی وەتەنمان ئەپشکوێ
میللەت ئومێدەوارە بە زانستی پێش کەوێ
زانستیە پلەی وڵات بڵند ئەکا
زانستیە کە ئێمە بناسێت بە ئەوروپا
زانستیە زۆر بەنرخە ئومێدی ئاتییە
ئەم ئیحتفالە فەئلە ڕوو لە هاتییە
تۆفیقی حەق بێتە ڕەفیقمان لەم ئیشەدا
وا دەست لە دەست، هەڵبەتە خوا قوەتیش ئەدا