«گۆرانی کوتنی مامە پیرە بۆ خەزاڵێ»
از کتاب:
لاس و خەزاڵ (فیدایی)
اثر:
ملا کریم فیدایی (1928-1993)
3 دقیقه
625 مشاهده
دەرفەت بوو کە مامە پیرە لاسێ
بەو دڵبەرە ئەو شەوەی بناسێ
دەخورایەوە شەو کە نان و چایی
ئاوایی حەوا دەدا هەوایی
سەر ئێشەمە وا دڵم لە ژانە
وەک شێتم و دەردەکەم گرانە
هێن چۆڵ و چیا و کەژ گەڕاوم
هەر وەک بنە وەندە بادراوم
هاتم لە وەڵاتی باڵەکانە
گەرمێنە دەگەڵ کوێستانە
کردوومە هەتا بە ئێرەگانە
وێڵم لە دوایی مایینانە
ئەی خانمی دڵ بە بێ غەم و دەرد
گەردەن وەکوو کارەبا بە بی گەرد
گەر هاتمە هۆبە تۆ بزانە
ئەمدیی نە زەوی نە ئاسمانە
دەمدی کە سەراسەر ئەو هەوارە
پاکی بە تەم و مژ و خومارە
وەمزانی کە ئاخیری زەمانە
نەم زانی کە تۆزی مێگەلانە
دەم دینەوە هێندە مێگەلی مەڕ
دنیایی بە قاڕە کرد بوو کەڕ
پۆل پۆل دەڕۆیی شەنگە بێری
بە گووارە و کرمەک و بە زێڕی
ئەستێرەیی نێو هەوایی مژ بوون
ئەوهانە جووان و لاو کوژ بوون
یەک غرمە لە بن گووێمە پەیدا
بوو، وام دەزانی لەو دەمەیدا
زێڕی دەڕووا بە بار قاروون
بەو دەنگە ئەمن دەبوومە مەجنوون
دیتم کە لە بەینی پێری یانە
هی تۆق و تەڵەسم و کرمەکانە
پێم وابوو کەوا سەدایی بەرموور
دێ کەژ لە پەڕەی درا بە مەنسوور
ئاوازەیی شام ڕەخت وابوو
دەتگوت کە زەوی بە فوو خەرابوو
ئێوارە کە مەڕ لە مۆڵدا بوو
هەر قاڕەو باڕە و هەرا بوو
ئەو هەم کە دەدیی بە سەد پەژارە
سەر سووڕ دەمام لەو هەوارە
هەروا بە هوڕی دەهاتم ئیدی
تا یەک نەفەرم لە هۆبەدا دی
من چوومەوە کن ئەوی بە گێژی
بەڵکی خەبەرێ بە من بوێژی
لێم پرسی لە چەند شتی دەزۆرە
دەی داوە وەڵامەکەم بە نۆرە
ئەوماڵی ئەتۆییدا نیشانم
ڕووم کردەوە دیوەخانی خانم
دەیگوت کە بچن لە دیوەخانە
گۆببنەوە منزڵی بەگانە
دەمدەی کە بە چاو تاوڵ و چیغ
لەو بازە چەقیم و بوومە بەر چیغ
ئەو تاوڵە سەر لە ئاسمانە
بەو بیست و چووارە لەو چڵانە
داوێنی حەریری ڕەنگ زەردە
بۆ زینەتە بەر چلەی لە بەردا
ڕستەی کە دەڵێی کەزی کچانە
ئاوریشمی جوانی ئیسفەهانە
مافوورە لە دەستکاری کرمان
سەد دانە دەبیندرێ لە دیوان
ڕوندراوە لە لایی دیوەخانە
چەن کورسی و سەندەڵی جوانە
سەرتاسەری پایە هەر لەوانە
پڕ پێچە بە وێنە نەردەوانە
لەو دەرکە دییارە خۆ بە ئەژمار
چل مایینی یاڵ وبژ بە ژەنگار
بەحرین و موحەندەک ئەو چلانە
کلکیان ئەوە هەر لەسەر چوانە
دەس بەندەل ئاورێشم چناوە
هەر مایینە دوویی تێ خراوە
نۆ ئەسپی ترۆک و باش و کەحلان
دابەستە بە ڕۆژ و شەو لەبۆ وان
ئەو خێوەتە وا لە من دیارن
جێ خێوەتی عاشقی هەژارن
وەک میر عەزیز وەک بوداغە
وەک ئەحمەد و وەک مەمەندی ئاغا
بیستوومە ئەوانە عاشقی تون
هەر بۆیە ئەلێرەکانە کەوتون
ئەوهانە لە چاوی کاکە لاسی
وەک پووشن ئەگەر ئەوی بناسی
ئەی خانمی خاوەنی جەماڵە
گەر خەزنەو زێڕ و زێو و ماڵە
بۆ تۆ بە کرور و بار گەر بێ
تۆ ناگەیە لاسە شۆڕ بە خودێ