ڕۆیشتنی جەهانگیر شا بۆ دیتنی ماهـ زەڕ ئەفشان و نۆش ئافەرین
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
5 دقیقه
340 مشاهده
دەر دەم پادشا ماهـ زەڕئەفشان
گرتش نە ئاغۆش بە دیدەی گریان
هەم بۆسا جەمین شای نۆش ئافەرین
هەر سێشان باهەم ڕێزنان ئەسرین
شا فەرما دەردەم بەزمێ کەن وە پا
تا کە ڕاحەت بان گشت نەرەنج ڕا
دەر ساعەت فەرما ڕەقاس ئاوەردن
مەجلیس چون بەهەشت پڕ فەرەح کەردن
جەهانگیر واتش ئەی نۆش ئافەرین
چ تەور دەعوا کەرد شازادەی گوزین
ساکە ئێد شنەفت شای نۆش ئافەرین
دیدەی شابازیش پڕ بی جە ئەسرین
واتش ئەی بابۆ پادشای گوزین
ئەوەند کەردش شەڕ تەلیسم بێ دین
هەرچێ کەردەبێ سەراسەر تەمام
یاونا بەعەرز شای واڵا مەقام
باز هەم قەمەرناز بەرئاما وە بەر
ئاما بە دیدار سەوڵ نازپەروەر
قەمەرناز کە دیش جەماڵ فەرزەند
بۆ نیا وە بۆی فەرزەند دڵبەند
* دیسان دیم وە چەم شێوەی جەماڵش
شاد بیم بەو دیدەی سیای غەزاڵش
ماهـ زەڕئەفشان گرتش نە ئاغۆش
جەمینش بۆسا بۆ نیا وە بۆش
گاهێ مەبۆسا پا و پەنجەی دەست
گاهێ مەبۆسا دیدەی شۆخ مەست
قەمەرناز واتش من ئێدەن عەزمم
ئیمشەو ئارەزووی مەجلیس بەزمم
مەبۆ من ئیمشەو وێنەی دڵداران
بەزمێ بسازووم پەرێ نازاران
تا خۆش دەماغ بۆن شای نازەنینم
ماهـ زەڕئەفشان نۆش ئافەرینم
بەزمێ بەی دەستور بکەرووم حاسڵ
ڕەنج ڕاگەشان بەرکەروون جە دڵ
مەجلیس دا زینەت سەوڵ قەمەرناز
فەرما ئاوەردن بەربەت چەنی ساز
نەغمە سەرایان خۆش نەوای ئاهەنگ
ڕەقاسان خاس شەیدای شۆخ شەنگ
گشت وە بەرگ شۆخ دڵاوێزەوە
بە لەنجەی کەلام شەکەر ڕێزەوە
ساقیان نەوڕەس جەمووی خەت سادە
دیدەی دیاشان مەستەن پێ بادە
چەند جە ڕەقاسان شیرین ئەندازان
هەریەک وەبەزمێ نازەنین نازان
چەند شیشەی ڕەنگین کەردن هەواڵە
هەریەک پڕ کەردن نە مەیی دوو ساڵە
* حازر کەرد تەمام ئاوەرد نەرووی کار
چەنی عەنبەرین بۆی نافەیی تەتار
چەندێ ساقیان سادەی خۆش جەماڵ
ئاوەرد بە مەجلیس شاهـ سۆسەن خاڵ
ئاوەردن شەراب زەجاجان مەی
مەرێزان نەجام ساقیان پەی پەی
گوڵبانگ نۆش باد خێزا جە یاران
بنۆش هەی بنۆش شای وەفاداران
* گڕەی چراغان شەمع دڵئەفرۆز
شەوق وێنەی بەیزای خورشید پڕسۆز
کزەی مووکەشان سەدای ناڵەی نەی
سۆز مەقامات موترێبان کەی
بۆی زوڵف عەنبەر ڕەقاس چالاک
مەکەرۆ زیندە مەرحوومان خاک
* بەو ساز و ئاواز و چەقانە و چەنگ
بەو لرفەی دامان ڕەقاسان زەنگ
بەو مەزەی شەراب بەو ساقی و جامە
بەو عوناب تەڕ مەغز بادامە
بەو جیلوەی جەماڵ ڕەقاس ساقی
ماوەردن جە نەو حەیات باقی
ئەو شەو تا بە سوب بە شادمانە
گۆش دان بە سەدای چەنگ و چەقانە
سەحەر بەرئاما خورشید خاوەر
ڕەوشەن کەرد بە نوور شۆڵەی منەوەر
نەخاو هۆرێزا شای فەریدوون فەڕ
قەرار گرت وە بان فەرش کورسیی زەڕ
تەڵەب کەرد فەرزەند عادڵ شای چینی
ئاوەرد بەو مەجلیس بەو نازەنینی
شازادە ئاما شا نەجا بەرخواست
جاش گرت نەجانیب ماوای دەست ڕاست
بە نەزم شیرین ئاما بە گوفتار
وات ئەی شازادە شێر کارزار
سەرگوزەشتەی وێت سەرئەنجام کار
دەعوای جانوەر دێوان موردار
بێ ئاب و نانیی ئەو سەحرا چۆڵە
تەلیسمات دێو کاخ زەنگۆڵە
نەدەست عەلقەم پەتیارەی بێ دین
چۆنت نەجات دا شای نۆش ئافەرین
شازادە یەکسەر گوزەشتەی ئەوقات
گشت عەرز شا کەرد خەلافێ نەوات
جەو دما کردار ئەمیر سەلیم گشت
حاڵی کەردش شا جە نیک و جە زشت
دەرلاد عیزەت خان تەڵەب کەرد وە پێش
وات ئەی بەدنمەک جە بیم بێ ئەندێش
تۆ ئەمیر سەلیم نەسیحەت کەردی
زەهر هەلاهەل بەدەست سپەردی
سوڵتان ئیبراهیم بە فەنا بەرۆ
هەم نۆش ئافەرین پەی وێش باوەرۆ
هەم جە تەخت و بەخت من ئاوارە بام
تۆ شاد بای بە موڵک ئێقلیم و سپام
عیزەت خان سەوگەند نەباڵای سەوگەند
مەوەرد بەدانای یەکتای خوداوەند
من نەبیم ئاگا جە کار فەرزەند
سەلیم موردار شووم ناپەسەند
ئەو بێ ئیخلاس بی گیر ئاوەردەن پێش
یاوا بە حەق کارکەردەی وێش
شا قەبووڵ نەکەرد سەوگەند وەردەنش
فەرما دەرساعەت دانە کەردەنش
وات یەسەرمەشق بۆ نەرۆزگاران
عیبرەت بۆ پەرێ خیانەتکاران
تا کەس خیانەت نەبۆ بە خدێش
نەکەرۆ چەنی خوداوەند وێش
چوون بەدنمەک بی وەفا نەبی پێش
یاوا بەکردار مکافات وێش
شا وات شازادە نەرووی موحێبەت
یەک حەرفێ دارووم بواچووم پەنەت
* ئیسە عێزەت خان بە فەنا بەردم
ڕیشەو بنچینەش جەبێخ ئاوەردم
تۆ وێت مەزانی شاهیت نەوریرەن
کار گشت شاهان بەدەست وەزیرەن
خان محەمەد خەیلێ دانا و پەسەندن
هەم شێر مەیدان هەم هونەرمەندن
نەرووی دڵسۆزی نەک بە زەویری
ببەخشەش بە من پەرێ وەزیری
شازادە واتش ئەمرێ سەنگینەن
من بێ خان محەمەد زیندەگیم نییەن
کلید فەرەح عەقڵ و هۆشمەن
جە عەیب و عیلەت پەردەپۆشمەن
بەڵێ یەک حەرفێ مەدارووم سەلاح
خەیلێ دروستەن حەمید مەلاح
دانای دوڕشناس جەواهێرناسەن
پەی وەزیر موڵک پادشا خاسەن
قەبوول کەرد حەرفش شای دانا تەدبیر
حەمید مەلاح کەردن بە وەزیر
فەرما بە گەنجوور باوەر خەزێنە
ئاوەردن خەلعەت سەد هەزار وێنە
پۆشا بە باڵای حەمید پڕ فام
کەردن بەوەزیر ئێقلیمات تەمام
حەمید چون ئاسەف شاهان گشت تەمام
سەقامگیر کەردش ئەهل شار تەمام
* شا خەیلێ خۆشحاڵ خاتر گوشادکەرد
نگین ئەمرش بەحەمید سپەرد