řoyştinî cehangîr şa bo dîtnî mah zeř efşan û noş aferîn
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
5 Xulek
357 Dîtin
der dem padşa mah zeř’efşan
girtiş ne aẍoş be dîdey giryan
hem bosa cemîn şay noş aferîn
her sêşan bahem řêznan esrîn
şa ferma derdem bezmê ken we pa
ta ke řaḧet ban gişt nerenc řa
der sa’et ferma řeqas awerdin
meclîs çun beheşt piř fereḧ kerdin
cehangîr watiş ey noş aferîn
çi tewr de’wa kerd şazadey guzîn
sake êd şineft şay noş aferîn
dîdey şabazîş piř bî ce esrîn
watiş ey babo padşay guzîn
ewend kerdiş şeř telîsim bê dîn
herçê kerdebê seraser temam
yawna be’erz şay wała meqam
baz hem qemernaz ber’ama we ber
ama be dîdar sewł nazperwer
qemernaz ke dîş cemał ferzend
bo nya we boy ferzend diłbend
* dîsan dîm we çem şêwey cemałş
şad bîm bew dîdey syay ẍezałş
mah zeř’efşan girtiş ne aẍoş
cemînş bosa bo nya we boş
gahê mebosa pa û pencey dest
gahê mebosa dîdey şox mest
qemernaz watiş min êden ’ezmim
îmşew arezûy meclîs bezmim
mebo min îmşew wêney diłdaran
bezmê bisazûm perê nazaran
ta xoş demaẍ bon şay nazenînim
mah zeř’efşan noş aferînim
bezmê bey destur bikerûm ḧasił
řenc řageşan berkerûn ce dił
meclîs da zînet sewł qemernaz
ferma awerdin berbet çenî saz
neẍme serayan xoş neway aheng
řeqasan xas şeyday şox şeng
gişt we berg şox diławêzewe
be lencey kelam şeker řêzewe
saqyan newřes cemûy xet sade
dîdey dyaşan mesten pê bade
çend ce řeqasan şîrîn endazan
heryek webezmê nazenîn nazan
çend şîşey řengîn kerdin hewałe
heryek piř kerdin ne meyî dû sałe
* ḧazir kerd temam awerd nerûy kar
çenî ’enberîn boy nafeyî tetar
çendê saqyan sadey xoş cemał
awerd be meclîs şah sosen xał
awerdin şerab zecacan mey
merêzan necam saqyan pey pey
gułbang noş bad xêza ce yaran
binoş hey binoş şay wefadaran
* giřey çiraẍan şem’ dił’efroz
şewq wêney beyzay xurşîd piřsoz
kizey mûkeşan seday nałey ney
soz meqamat mutrêban key
boy zułf ’enber řeqas çalak
mekero zînde merḧûman xak
* bew saz û awaz û çeqane û çeng
bew lirfey daman řeqasan zeng
bew mezey şerab bew saqî û came
bew ’unab teř meẍiz badame
bew cîlwey cemał řeqas saqî
mawerdin ce new ḧeyat baqî
ew şew ta be sub be şadmane
goş dan be seday çeng û çeqane
seḧer ber’ama xurşîd xawer
řewşen kerd be nûr şołey minewer
nexaw horêza şay ferîdûn feř
qerar girt we ban ferş kursîy zeř
tełeb kerd ferzend ’adił şay çînî
awerd bew meclîs bew nazenînî
şazade ama şa neca berxiwast
caş girt necanîb maway dest řast
be nezim şîrîn ama be guftar
wat ey şazade şêr karzar
serguzeştey wêt ser’encam kar
de’way canwer dêwan murdar
bê ab û nanîy ew seḧra çołe
telîsmat dêw kax zengołe
nedest ’elqem petyarey bê dîn
çonit necat da şay noş aferîn
şazade yekser guzeştey ewqat
gişt ’erz şa kerd xelafê newat
cew dima kirdar emîr selîm gişt
ḧałî kerdiş şa ce nîk û ce zişt
derlad ’îzet xan tełeb kerd we pêş
wat ey bednimek ce bîm bê endêş
to emîr selîm nesîḧet kerdî
zehir helahel bedest siperdî
sułtan îbrahîm be fena bero
hem noş aferîn pey wêş bawero
hem ce text û bext min aware bam
to şad bay be mułk êqlîm û sipam
’îzet xan sewgend nebałay sewgend
mewerd bedanay yektay xudawend
min nebîm aga ce kar ferzend
selîm murdar şûm napesend
ew bê îxlas bî gîr awerden pêş
yawa be ḧeq karkerdey wêş
şa qebûł nekerd sewgend werdenş
ferma dersa’et dane kerdenş
wat yesermeşq bo nerozgaran
’îbret bo perê xyanetkaran
ta kes xyanet nebo be xidêş
nekero çenî xudawend wêş
çûn bednimek bî wefa nebî pêş
yawa bekirdar mikafat wêş
şa wat şazade nerûy muḧêbet
yek ḧerfê darûm bwaçûm penet
* îse ’êzet xan be fena berdim
řîşew binçîneş cebêx awerdim
to wêt mezanî şahît newrîren
kar gişt şahan bedest wezîren
xan miḧemed xeylê dana û pesendin
hem şêr meydan hem hunermendin
nerûy diłsozî nek be zewîrî
bibexşeş be min perê wezîrî
şazade watiş emrê sengînen
min bê xan miḧemed zîndegîm nîyen
kilîd fereḧ ’eqił û hoşmen
ce ’eyb û ’îlet perdepoşmen
bełê yek ḧerfê medarûm selaḧ
xeylê dirusten ḧemîd melaḧ
danay duřşinas cewahêrnasen
pey wezîr mułk padşa xasen
qebûl kerd ḧerfiş şay dana tedbîr
ḧemîd melaḧ kerdin be wezîr
ferma be gencûr bawer xezêne
awerdin xel’et sed hezar wêne
poşa be bałay ḧemîd piř fam
kerdin bewezîr êqlîmat temam
ḧemîd çun asef şahan gişt temam
seqamgîr kerdiş ehil şar temam
* şa xeylê xoşḧał xatir guşadkerd
nigîn emirş beḧemîd siperd