çûnî şa û şazade bo lay feyazî ’abêd û marebřînî noş aferîn bo şazade îbrahîm
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
3 Xulek
352 Dîtin
şah û wezîran gişt be ser’efraz
lwan be xidmet baregay feyaz
dest besînewe lazmen labud
kerdişan selam feyaz ’abêd
’abêd piř feyz horêza we pa
’eleyk da cwab ce selam şa
dest kerd negerden şazadey çînî
bosa gerdenş ta çał tînî
xeylê tewazu’ buzirgane kerd
qanûn û řewyey gişt be ca awerd
cew demda berûy yaran gişt nezer
watiş şazade şêr diławer
xeylê kêşay řenc řagey piř xeter
zeḧmet derya û byaban û beř
kerîm karsaz řaber řat bê
her cayê lway pey to necat bê
danay keremdar bexşa tofîqit
hîmet xasan bî be řefîqit
ce gişt afatan nîgehdarît kerd
nazenînanit ce bend ber’awerd
şadkam wesił naz endazanî
necergey dilêr ser’efrazanî
dewran fełek ama bekamit
sikey nîknamî ji enya be namit
îqbałit taze bextit bedî’en
şahan ’ałem beto mutî’en
îsim ’ezaym te’lîm kerdiş pêş
şazade awerd gişt be ḧîfiz wêş
wat cey dima nebot endêşe
ya ce ademî ya şêr bêşe
ce dimay řazan ḧerfan diłgîr
be fermûdey lutif padşay cehangîr
nîkaḧ dułber şox dîdemest
feyaz ’abêd pey şazade best
mîsrî nebatan xeylê awerdin
pey mubarekî tenawił kerdin
guł xende kerdin yaran ce şadî
bedił kerdişan mubarek badî
řû kerd be canîb xan miḧemed û feyaz
wat sed aferîn şêr ser’efraz
saḧêb ’eqił û fam wefadarenî
ce herdû dunya řestigarenî
şerit merdane beca awerdî
nam menşûrît yawa be merdî
çun nîku kirdar nebî ferîbit
mah zeř’efşan bî be nesîbit
be şadkamî ta be ser’encam
be meqsûd dił menoşan bekam
nek wêney selîm bê ’eqił û danş
ta dinya menden bî be serzenş
cew dima watiş ḧemîd melaḧ
karit dirusten berewye û selaḧ
çunke tenit pak nîkukirdarî
yeqîn îxlasî xidmetguzarî
xuday bała dest bextit kerd fîroz
nesîbit mebo mah cehansoz
dimay giftugoy murşîd kamił
gişt merexes kerd be murad dił
şah û şazade, wezîran yekser
ce sewm’ey pak ber’aman we ber
* yek mah nedemişq wiyardin bekam
ne bezim saz û neqił û bade û cam