پاش ئەو ڕووداوە نۆش ئافەرین و ماهـ زەڕئەفشان بەو بەسەرهاتەیان زانی
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
3 دقیقه
357 مشاهده
ماهـ زەڕئەفشان وات نۆش ئافەرین
هاوەختەن بەیو شازادەی شیرین
مەیموونە خاتوون چەنی سپای وێش
هاوەختەن بەیۆ شۆخ بێ ئەندێش
جەودەم شازادە چەنی ڕوخ ئاما
تا کە داخڵ بی وە شار خەتا
ئاما وە حەرەم شازادەی گوزین
دیش نۆش ئافەرین نیشتەن وەغەمین
ئەحواڵ لێش پەرسان بە کۆ شییەنی
ئینە سێ ڕۆژەن دیار نییەنی
شازادە واتش پەروەرش جادوو
من وست نەرووی چا ئەو شووم بەدخوو
ئێد وات و دەرلاد هۆرێزا وە پا
ڕوو کەرد نەسەرای ئەلیاس پادشا
نەعرەتە پێکا شێر ڕۆی غەزا
ئەلیاس نە ڕووی تەخت دەردەم کە لەرزا
سەراسیمە بی ئەلیاس دڵرێش
وات مەلیک تووفان چێش بکەرین چێش
تووفان وات ئەلیاس نەعەقڵ سادە
تۆ دەست کۆتا کەر تۆ نە شازادە
سوڵتان ئیبراهیم بەدار کیانای
شازادە هەلاک یا موردە زانای
ئەلیاس وات ئەو کار نەدەس بەرشییەن
ئیسە ئەی تەدبیر ئەی کارە چییەن
نەی گفتوگۆ بین شازادەی دلێر
پەیدابی ئاما وێنەی نەڕەشێر
واتش ئەی ئەلیاس کارێ خاس کەردی
من و خان محەمەد بە پای دار بردی
دەست بەرد ئەلیاس شا ئاوەردش بە وار
بە کەشان کەشان بەردش وە پای دار
ئەی خەوەر بە گۆش ئەهل شار یاوا
پەرێ ئەلیاس شا جەرگشان کاوا
شازادە لوا نیشت وە بان تەخت
تووفان و وەزیر شووم ناشنەخت
خان محەمەد چەنی حەمید سەروەر
هەردوو جە زیندان بەرئامان وە بەر
لوان بە خدمەت شازادەی گوزین
هەردوو ڕوو ماڵان نە ڕووی سەرزەمین.
خان محەمەد واتش شازادەی سالار
ببەخشە بەمن ئەلیاس نامدار
شازادە فەرما ئەلیاس ئاوەردن
خەلعەت شاهی دەرلەحزە کەردن
مورغ کە هۆرێزا هیمەتخواهی کەرد
قەدرێ ئەمانەت پەی بەچەگان بەرد
شازادە ئەلیاس زیافەت کەردش
شازادە و یاران مێهمانی کەردش
دمای چەند ڕۆژی فەرما کۆچ کەردن
ڕوونە وەلابەت فەرەنگی کەردن
تا کە داخڵ بین وە فەرەنگ ماوا
خەیمە و خەرگاهش دەردەم کەرد بەرپا
شازادە نەوجا گرتشان قەرار
وەختێ نیگا کەرد پەیدا بی غوبار
جە وڵات فەرەنگ سپای سەدهەزار
لەشکر فراوان ئاما وەئەی شار
پەرسا جە شەخسی چێشەن ئەی سپا
ئەی جەنگە چێشەن مەکەران نەی جا
ئەو شەخس عەرز کەرد شازادەی سالار
سپای زیگووات ئاما وە ئەی شار
پادشای فەرەنگ کناچەی دارو
هەزار کەس پەیش ئەرواح مەسپارۆ
خورشید عاڵەم شای عاڵەمگیرەن
عاڵەم نە سەوداش بەستەی زەنجیرەن
هەر کەس بوینۆ ئەو خورشید شێوە
دێوانە مەبۆ سەرسام و لێوە
ئێدەن خەیاڵش سەرهەنگ موردار
بەزۆر بکێشۆ خورشید نازدار
بەو تەورە کە شار ئاوەردەن بە تەنگ
وەختەن بەرباد بۆ تایفەی فەرەنگ
شازادە ئەژنی دەروونش ئێشا
ڕوو نیا بەوجا جۆشا و خرۆشا
واتش خان محەمەد حەمید سالار
زوو بیاونەوە پەرێ کار زار
شازادە چون شێر حەمڵەیێ کەردش
ئەی تیپ بە داخڵ ئەو تیپ بکەردش
سپای زەنگییان کەردشان فێرار
سپای سالاری مەند نەکارزار
شازادە ڕوو کەرد نە سپای سالار
واتش ئەی مەلعوون شووم نابێکار
ئاما وە جەواب تۆ موسڵمانی
پەی چێش وەفەرەنگ ئیمداد مەنمانی
شازادە واتش مەلعوون بەدکار
ئەی زەربە بنۆش نەرووی کار زار
دا نە ڕووی ئەسپەر بەقارو بەقین
دوولەت کەرد تا ناف کەفت نە ڕووی زەمین