paş ew řûdawe noş aferîn û mah zeř’efşan bew beserhateyan zanî
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
369 views
mah zeř’efşan wat noş aferîn
hawexten beyu şazadey şîrîn
meymûne xatûn çenî sipay wêş
hawexten beyo şox bê endêş
cewdem şazade çenî řux ama
ta ke daxił bî we şar xeta
ama we ḧerem şazadey guzîn
dîş noş aferîn nîşten weẍemîn
eḧwał lêş persan be ko şîyenî
îne sê řojen dyar nîyenî
şazade watiş perwerş cadû
min wist nerûy ça ew şûm bedxû
êd wat û derlad horêza we pa
řû kerd neseray elyas padşa
ne’rete pêka şêr řoy ẍeza
elyas ne řûy text derdem ke lerza
serasîme bî elyas diłrêş
wat melîk tûfan çêş bikerîn çêş
tûfan wat elyas ne’eqił sade
to dest kota ker to ne şazade
sułtan îbrahîm bedar kyanay
şazade helak ya murde zanay
elyas wat ew kar nedes berşîyen
îse ey tedbîr ey kare çîyen
ney giftugo bîn şazadey dilêr
peydabî ama wêney neřeşêr
watiş ey elyas karê xas kerdî
min û xan miḧemed be pay dar birdî
dest berd elyas şa awerdiş be war
be keşan keşan berdiş we pay dar
ey xewer be goş ehil şar yawa
perê elyas şa cergişan kawa
şazade lwa nîşt we ban text
tûfan û wezîr şûm naşnext
xan miḧemed çenî ḧemîd serwer
herdû ce zîndan ber’aman we ber
lwan be xidmet şazadey guzîn
herdû řû małan ne řûy serzemîn.
xan miḧemed watiş şazadey salar
bibexşe bemin elyas namdar
şazade ferma elyas awerdin
xel’et şahî derleḧze kerdin
murẍ ke horêza hîmetxiwahî kerd
qedrê emanet pey beçegan berd
şazade elyas zyafet kerdiş
şazade û yaran mêhmanî kerdiş
dimay çend řojî ferma koç kerdin
řûne welabet ferengî kerdin
ta ke daxił bîn we fereng mawa
xeyme û xergahiş derdem kerd berpa
şazade newca girtişan qerar
wextê nîga kerd peyda bî ẍubar
ce wiłat fereng sipay sedhezar
leşkir firawan ama we’ey şar
persa ce şexsî çêşen ey sipa
ey cenge çêşen mekeran ney ca
ew şexis ’erz kerd şazadey salar
sipay zîguwat ama we ey şar
padşay fereng kinaçey daru
hezar kes peyş erwaḧ mesparo
xurşîd ’ałem şay ’ałemgîren
’ałem ne sewdaş bestey zencîren
her kes bwîno ew xurşîd şêwe
dêwane mebo sersam û lêwe
êden xeyałş serheng murdar
bezor bikêşo xurşîd nazdar
bew tewre ke şar awerden be teng
wexten berbad bo tayfey fereng
şazade ejnî derûnş êşa
řû nya bewca coşa û xiroşa
watiş xan miḧemed ḧemîd salar
zû byawnewe perê kar zar
şazade çun şêr ḧemłeyê kerdiş
ey tîp be daxił ew tîp bikerdiş
sipay zengîyan kerdişan fêrar
sipay salarî mend nekarzar
şazade řû kerd ne sipay salar
watiş ey mel’ûn şûm nabêkar
ama we cewab to musłimanî
pey çêş wefereng îmdad menmanî
şazade watiş mel’ûn bedkar
ey zerbe binoş nerûy kar zar
da ne řûy esper beqaru beqîn
dûlet kerd ta naf kefit ne řûy zemîn