lehoşçûnî şazade û kotkirdinî
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
547 views
celaş ke nîştin cadûy sehmigîn
nîga mekerdin be boẍiz û yeqîn
şazade watiş şûm bê îman
pey çîş awerdî min be ey mekan
le’în wat namim ba nebo penhan
perwerş cadûm bê namunîşan
emin ke duxter arayş dêwim
pey hûn ’elqem xatir peşêwim
şiş mah hen pey to min kerdim feryad
ta aro ke tom nedar da necat
şerit bo ne tenxiway xwêş û birader
kerût we’îbret ’ałem seranser
ta ademîzad ’îbret bigîran
îtir hîç karê bey tewr nekeran
êd wat û sê des zencîr awerdiş
awêzan be cay sehminak kerdiş
yek seng giran mel’ûn awerdiş
ser ew ça bewseng hem muḧkem kerdiş
her řoj ke mama mel’ûn gumra
xeylê sizay sext şazade meda
řojê şazade ’aciz bî negyan
penake berdiş bezat subḧan
ewřo şazade xeylê xeyał kerd
wat min mîwey ’ûd hem sencim awerd
min ḧełqey zencîr bikerûm pare
řestigar bûm ne dest şûm bew çare
êd wat û derlad tekan da çun şêr
zencîrş biřî bewr deng dilêr
xeylê nîga kerd horêza we pa
dîş tîẍ ełmas ḧazren newca
ewend ko kiryan meta û cewahêr
xermen xermenen çun seng bahêr
şazade tîẍ ełmas nepişt best
xencer teła girtiş nerûy dest
perwerş cadû peyda bî newca
çun bewr piř zor şî beser ça
dest girtiş be seng newca hewada
şazade çun şêr tekan da new ca
ew tîẍ ełmas daş ne řûy kemer
kerdiş be dû nîm çun xeyar teř
sa toz û ẍubar derdem peyda bî
dunya seranser yekser sya bî
horêza lwa new seḧray hamûn
naga ce teqdîr karsaz bê çûn
sya çadrê dyaren ce dûr
nedûr dyaren çun şerarey nûr
zor da nepence yawa be’ew ca
yawa be çadir serta pa sya
wat saḧêb yane mêhmanit ama
mêhman ’ezîz hem ce lay xuda
ama beřûy der yek pîre załê
koney zemane saḧêb kemałê
watiş ey mihman weş amay we xeyr
sakin ber necay kosaran deyr
şazade berdiş hem betwî çadir
qurs nan co perêş kerd ḧazir
şazade watiş cekam dyarî
îta’et nimay kam şehryarî
pîrzał watiş be şah fereng
îta’e darû salar serheng
ahîr nederûn buryan kerdiş geş
peř murẍ awerd da ne řûy ateş
derlad ḧazir bî murẍ wefadar
ama we xizmet şazadey salar
dest berd û zerîf nya ne řûy bał
nîşt ne řûy hewa murẍ zeřîn bał
be taw û te’cîl řûnya we řa
řû kerd ne ew mułk pey şar xeta
ba ke şazade wey ḧerf şîrîn
bişîn we serwext şay noş aferîn