هەستکردنی خان محەمەد لە پیلانەکە و کەمتەرخەمیی شازادە
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
2 دقیقه
327 مشاهده
سێ شەو و سێ ڕۆژ زیافەت کەردن
بە وێنەی غولام خدمەت مەکەردن
شەوێ جە شەوان فرسەت ماوەردن
دارووی بێ هۆشی وە تەعام کەردن
هەردوو دەست کێشان نە ڕووی تەعامان
بە مەکر و حیلە لێشان نەزانان
دارووی بێ هۆشی بەی تەور جۆش ئاوەرد
جە ناگا هەر دوو دەردەم بێ هۆش کەرد
خان و شازادە زەنجیر بەند کەردن
تا پای تەخت ئەلیاس شا بەردن
هەردووشان دەردەم بەهۆش ئاوەردش
شازادە نیگای ئەلیاس شا کەردش
واتش ئەی ئەلیاس چ گونام کەردن
بەی تەور بێ گونا زەنجیرم کەردن
ئەلیاس ئێد شنەفت ئاما بەگوفتار
واتش شازادە بێ خەبەر نەکار
نەشار دەمشق چ کارێ کەردی
ئابڕوو حەیا و نامووسم بەردی
مەگەر تۆ ئارۆ ناوەردی وەیاد
دنیا بەی تەورەن هەرچێ باداباد
دەردەم فەرمان دا جەلاد ئاوەردن
خان و شازادە وە پای دار بەردن
ئەلیاس وات یاران کەمان هۆرگێران
هەردووشان تیرڕێژ تیر باران کەران
شازادە دەردەم کێشا ئاهـ سەرد
وێش بە خوداوند ئاسمان سپەرد
واتش خان محەمەد چ کارێ کەردیم
بەدەست ئەلیاس چ تەور گیر وەردیم
خان محەمەد ئەژنی ئاما بە گوفتار
ئینشەڵا بە زوود مەبین ڕەستگار
من یەقین دارووم وەپەروەردگار
هاوەختەن بەیۆ خاتوونەی نازدار