گەیشتنی مورغ و پاشماوەی ڕووداوەکە
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
3 دقیقه
366 مشاهده
ناگاهـ جە هەوا مورغ بی پەیدا
دیش کە دیارەن سەلیم گومرا
نەزانا ئەو شۆخ زولف عەنبەرینەن
شاهـ گەوهەر تاج نۆش ئافەرینەن
نەعرە بەرئاوەرد واتش ئەی لەعین
جە کۆن ناپەیدان شای نۆش ئافەرین
نۆش ئافەرین زوود نیگای باڵا کەرد
مورغ خۆش کەلام بە نەزەر ئاوەرد
واتش ئەی مورغ ئەی یار گیانی
من سەلیمم کوشت بە تۆ مزگانی
مورغ دەرساعەت نازار شناسا
ساتێ سەرسام بی لادێ تەواسا
کەفت نە خاک پای شای نۆش ئافەرین
چون نەجاتت بی نە دەست لەعین
فەرما بە خەنجەر سەلیم ناپاک
بە تیغ ئەڵماس سینەش کەردم چاک
ئامانەن ئەی ڕوخ شازادەی سالار
چونەن چ تەورەن شای والا تەبار
خاتوونە چەنی عەبدورەحمان شا
حەکیمان شا چەنی نەسرۆڵا
یەکسەر حەکیمان پەرێش ئاوەردن
موعالەجەی دەرد شازادە کەردن
نازار ئێد شنەفت شوکر خودا کەرد
واتش شازادە بە خودام سپەرد
مورغ نازارش بەردش وەهەوا
واتش بە تەعجیل ڕەوان بین وە ڕا
وەعدەی سێ ساعەت یاوان بە ئەوجا
خەیمە شازادە دەردەم دیار دا
بە ئەندەک ئەندەک ئاوەرد بە پاین
واتش شازادە یە نۆش ئافەرین
مەیموونە خاتوون زوڵفان عەنبەرین
لوا وە پێشواز شای نۆش ئافەرین
لەب وە خەندەوە سەلام کەرد بە ناز
عەلەیکش داوە شای شەکەرین ڕاز
گەوهەر تاج چەنی خاتوونەی نازار
لوان بە خدمەت شازادەی سالار
سەلام بەرووی ناز شازادە کەردش
ئاداب ئەرکان بەجا ئاوەردش
شازادە نیگای نۆش ئافەرین کەرد
هەردووشان دەردەم کێشان ئاهـ سەرد
دیدەشان بەناز پڕ بی جە ئەسرین
ئاخر بین بێ هۆش نە ڕووی سەرزەمین
مەیموونە خاتوون نەجا هۆرێزا
بۆی عەتر و گوڵاب وە سەردا ڕێزا
هەردوو بێدار کەرد نە خاو شیرین
شازادە چەنی شای نۆش ئافەرین
شازادە جە نەو ئەحواڵ مەپەرسا
واتش کە سەلیم چون کەردی فەنا
شای نۆش ئافەرین گوزەشتە یەکسەر
یاونا بەعەرز شازادەی سەروەر
شازادە شنەفت خەیلێ بی خۆشحاڵ
بۆسە دا جەمین گۆنای سۆسەن خاڵ
مەیموونە خاتوون چەنی مورغ خاس
جەلای شازادە کەردن ئیلتیماس
عەبدورەحمان شا تەشریف ئاوەردش
مورغ و خاتوونە مەرەخەس کەردش
وەختێ کە لوا عەبدورەحمان شا
شازادە فەرما خەیمە و بارەگا،
دەردەم کە لوان بەڕاگەی حەلەب
مدارا نەکەرد بە ڕۆژ و بە شەب