geyştinî murẍ û paşmawey řûdaweke
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
3 Xulek
379 Dîtin
nagah ce hewa murẍ bî peyda
dîş ke dyaren selîm gumra
nezana ew şox zulf ’enberînen
şah gewher tac noş aferînen
ne’re ber’awerd watiş ey le’în
ce kon napeydan şay noş aferîn
noş aferîn zûd nîgay bała kerd
murẍ xoş kelam be nezer awerd
watiş ey murẍ ey yar gyanî
min selîmim kuşt be to mizganî
murẍ dersa’et nazar şinasa
satê sersam bî ladê tewasa
kefit ne xak pay şay noş aferîn
çun necatit bî ne dest le’în
ferma be xencer selîm napak
be tîẍ ełmas sîneş kerdim çak
amanen ey řux şazadey salar
çunen çi tewren şay wala tebar
xatûne çenî ’ebdureḧman şa
ḧekîman şa çenî nesroła
yekser ḧekîman perêş awerdin
mu’alecey derd şazade kerdin
nazar êd şineft şukir xuda kerd
watiş şazade be xudam siperd
murẍ nazarş berdiş wehewa
watiş be te’cîl řewan bîn we řa
we’dey sê sa’et yawan be ewca
xeyme şazade derdem dyar da
be endek endek awerd be payn
watiş şazade ye noş aferîn
meymûne xatûn zułfan ’enberîn
lwa we pêşwaz şay noş aferîn
leb we xendewe selam kerd be naz
’eleykiş dawe şay şekerîn řaz
gewher tac çenî xatûney nazar
lwan be xidmet şazadey salar
selam berûy naz şazade kerdiş
adab erkan beca awerdiş
şazade nîgay noş aferîn kerd
herdûşan derdem kêşan ah serd
dîdeşan benaz piř bî ce esrîn
axir bîn bê hoş ne řûy serzemîn
meymûne xatûn neca horêza
boy ’etir û gułab we serda řêza
herdû bêdar kerd ne xaw şîrîn
şazade çenî şay noş aferîn
şazade ce new eḧwał mepersa
watiş ke selîm çun kerdî fena
şay noş aferîn guzeşte yekser
yawna be’erz şazadey serwer
şazade şineft xeylê bî xoşḧał
bose da cemîn gonay sosen xał
meymûne xatûn çenî murẍ xas
celay şazade kerdin îltîmas
’ebdureḧman şa teşrîf awerdiş
murẍ û xatûne merexes kerdiş
wextê ke lwa ’ebdureḧman şa
şazade ferma xeyme û barega,
derdem ke lwan beřagey ḧeleb
midara nekerd be řoj û be şeb