بردنی نۆش ئافەرین لەلایەن زەلغەمەوە
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
3 دقیقه
638 مشاهده
جە نەو بشنەوین جە نۆش ئافەرین
وەقتێ بەرد مەلعوون زەلغەم بێ دین
سەوڵ سیم ئەندام گرتە بی وە دۆش
جە سەرددۆشدا جە غەم بی بێ هۆش
چون ئاما بە هۆش شۆخ شیرین تەرز
دیش هاجە کۆهێ خەیلێ عالی و بەرز
زەلغەم کەبەردش وە ڕووی هەواوە
چون مار سیاهـ چەم وەنیگاوە
ئاهـ سەرد کێشا ماتەم و پەشێو
جە تەرس و جەخۆف سەلام کەرد بە دێو
دێو بەدسرێشت ئاما بەگوفتار
وات نۆش ئافەرین ئەرێ بەدکردار
ئەی شووم سیای بەدخۆی بەدسرێشت
برا و کەسوکار تەمام دای وەکوشت
شەرت بۆ جە قەساس خوێش و برادەر
کارێ بەو تەورە باوەرم وە سەر
جەفای فراوان بدەرم پەرێت
جە قاف تا بە قاف عیبرەت گیرۆن لێت
ئەو مورغ کەم فام بی نام و نیشان
شەرت بۆ یەک کارێ بکەرووم پێشان
بواچانەوە نەرووی زەمانە
بۆ وە سەرزەنش خوێش و بێگانە
شای نۆش ئافەرین دەروون پڕ جە دەرد
پەرێ شازادە کێشا ئاهـ سەرد
وات ئەی پادشای فەرد بێ نەزیر
بینای کردگار قەیوم قەدیر
تۆ فەریاد ڕەسی پەی بێ کەسان گشت
بدەر نەجاتم جەی مەلعوون زشت
زەلغەم چون شنەفت ڕاز و گوفتارش
چەند زلەی ستەم دا نە ڕوخسارش
دەست کەرد بەزاری شای نۆش ئافەرین
واتش ئەی مەلعوون پەتیارەی بێ دین
خەتای من چێشەن شازادەی چالاک
ماوەرۆ پەی تۆ ئەو مورغ بێ باک
دێو کە [ئێد] شنەفت وات ئەی بەدگەوهەر
بە فەریب تۆ کێ دارۆ باوەر
شەرت بۆ بەچە مورغ هەردوو چەنی تۆ
بسۆزم تەمام وە ئاتەش بێ شۆ
ئێد وات غایب بی ئەو دێو کەچ نەرد
شی وەلانەی مورغ دوو بەچەش ئاوەرد
جەباڵای هەوا ئاوەرد بە پاین
نیا وەلای دەست شای نۆش ئافەرین
* بەچە دەست کەردن وەبێ قەراری
مەرێزنان یەک یەک ئەسر مرواری
بەچە ها واتن شای نۆش ئافەرین
ئێمە ئاوەردەن مەلعوون بێ دین
ئێمە و تۆ هەر سێ ئەی دێو سەرکەش
بە سەزا و جەفا سۆزۆ بە ئاتەش
هەر سێ جەستەمان سفتەی زوخاڵ بۆ
گەردمان وە خاک باد شەماڵ بۆ
ئەگەر شازادە نەیۆ وە ئەی خاک
جە داغ هیجران تۆ مەبۆ هەلاک
نۆش ئافەرین وات مورغ خۆش کەلام.
فەرزەند عەزیز نیکزادەی نیک نام
ئەرسەد دێو بەی تەور بدەرۆ سەزام
قەسەم وە بێچون دانای لایەنام
دێو بە قەهر و جۆش جەفا بدۆ پێم
من باکم نییەن جە مەردەنیی وێم
ئەعزام ڕێزە بۆ جە شەرارەی نار
هەر ئەوە خاسەن جە مەحروومیی یار
مەرگ یەک دەفعە مایەی نەجاتەن
هیجران پەرێمان دوردو مەماتەن
جەی گفتوگۆ بی شیرین غەمکێش
ناگاهـ پەیدا بی دێو بەدئەندێش
بەدەستێ گرتش باهۆی سۆسەن خاڵ
بەودەست گرت بەچەی مورغ زەڕین باڵ.
ڕوو کەرد وە باڵا بە حەرف ناخۆش
هەرسێشان ئاوەرد ڕووبەڕووی ئاتەش
نۆش ئافەرین دیش ئاهـ سەرد کێشا
جەداغ دەروون هیجران مەنۆشا