birdinî noş aferîn lelayen zelẍemewe
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
838 views
ce new bişnewîn ce noş aferîn
weqtê berd mel’ûn zelẍem bê dîn
sewł sîm endam girte bî we doş
ce serdidoşda ce ẍem bî bê hoş
çun ama be hoş şox şîrîn terz
dîş hace kohê xeylê ’alî û berz
zelẍem keberdiş we řûy hewawe
çun mar syah çem wenîgawe
ah serd kêşa matem û peşêw
ce ters û cexof selam kerd be dêw
dêw bedsirêşt ama beguftar
wat noş aferîn erê bedkirdar
ey şûm syay bedxoy bedsirêşt
bira û kesukar temam day wekuşt
şerit bo ce qesas xwêş û birader
karê bew tewre bawerim we ser
cefay firawan biderim perêt
ce qaf ta be qaf ’îbret gîron lêt
ew murẍ kem fam bî nam û nîşan
şerit bo yek karê bikerûm pêşan
bwaçanewe nerûy zemane
bo we serzenş xwêş û bêgane
şay noş aferîn derûn piř ce derd
perê şazade kêşa ah serd
wat ey padşay ferd bê nezîr
bînay kirdigar qeyum qedîr
to feryad řesî pey bê kesan gişt
bider necatim cey mel’ûn zişt
zelẍem çun şineft řaz û guftarş
çend ziley sitem da ne řuxsarş
dest kerd bezarî şay noş aferîn
watiş ey mel’ûn petyarey bê dîn
xetay min çêşen şazadey çalak
mawero pey to ew murẍ bê bak
dêw ke [êd] şineft wat ey bedgewher
be ferîb to kê daro bawer
şerit bo beçe murẍ herdû çenî to
bisozim temam we ateş bê şo
êd wat ẍayb bî ew dêw keç nerd
şî welaney murẍ dû beçeş awerd
cebałay hewa awerd be payn
nya welay dest şay noş aferîn
* beçe dest kerdin webê qerarî
merêznan yek yek esir mirwarî
beçe ha watin şay noş aferîn
ême awerden mel’ûn bê dîn
ême û to her sê ey dêw serkeş
be seza û cefa sozo be ateş
her sê cesteman siftey zuxał bo
gerdiman we xak bad şemał bo
eger şazade neyo we ey xak
ce daẍ hîcran to mebo helak
noş aferîn wat murẍ xoş kelam.
ferzend ’ezîz nîkzadey nîk nam
ersed dêw bey tewr bidero sezam
qesem we bêçun danay layenam
dêw be qehir û coş cefa bido pêm
min bakim nîyen ce merdenîy wêm
e’zam řêze bo ce şerarey nar
her ewe xasen ce meḧrûmîy yar
merg yek def’e mayey necaten
hîcran perêman durdu mematen
cey giftugo bî şîrîn ẍemkêş
nagah peyda bî dêw bed’endêş
bedestê girtiş bahoy sosen xał
bewdest girt beçey murẍ zeřîn bał.
řû kerd we bała be ḧerf naxoş
hersêşan awerd řûbeřûy ateş
noş aferîn dîş ah serd kêşa
cedaẍ derûn hîcran menoşa