زەلغەم نۆش ئافەرین دەبا بۆ چیای زەرغام
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
2 دقیقه
667 مشاهده
خانا گۆش بدەر دنیا بێ شەرمەن
هەر ڕۆ بە ڕەنگێ بازاڕش گەرمەن
گاهێ مەدۆ نۆش گاهێ مەدۆ ڕەنج
گاهێ مەدۆ سەنگ دەمێ مەدۆ گەنج
شازادە پەرسا جە نۆش ئافەرین
جەکۆن ناپەیدان زەلغەم بێ دین
واتش فیدات بام جەی ماوا نییەن
ئینە دوو ڕوەن فێراری بییەن
وات سا تۆ نەی جا بنیشە بەکام
تا من بگێڵووم ئەی ماوا و مەقام
بەڵکو پەیدا کەم مەلعوون ناپاک
وێنەی برادەر غەڵتان کەم نەخاک
شازادە لوا بێ خەبەر جە کار
بە فرسەت زانا جادووی نابێکار
ناغافڵ مەلعوون ئاما پەدیدار
دەست کێشا هۆرگرت شیرینی نازدار
بەتاو و تەعجیل مدارا نەکەرد
نۆش ئافەرین بەرد نە گونبەد ویەرد
سوڵتان ئیبراهیم هەرچ کۆشش کەرد
زەلغەم جادوو هیچ پەیدا نەکەرد
وەقتێ کە ئاما شێر بێ ئەندێش
دیش نۆش ئافەرین نەمەند نە جای وێش
دیا نەمەندەن دەروونش جۆشا
تۆ واچە شەربەت هەلاهێل نۆشا
ئاهـ سەرد کێشا کەفت وە تەخت خاک
جە سەر تا وە پا یەقە کەردش چاک
دەرسات پەیدا بی مورغ خۆش سیفات
واتش فیدات بام چێشەن مودەعات
گوزەشتەی ئەحواڵ بەیان کەرد جەلاش
بەزاری و شیوەن کەفت نەخاک پاش
مورغ وات عەزیزم گیانم بۆ فەدات
ئەرجەکۆی قاف بۆ ماوەرووم وەڵات
تا پەیدا نەکەم ماهـ قەسەب پۆش
جەلام حەرام بۆ خورد و خواب و نۆش
ئینشەڵا بەعەون دەهەندەی جەبار
ئەر جە ئەفلاک بۆ ماوەرووم بەوار
مەگەر من مەردەم ئەی گیانی شیرین
پەی چێش نەگۆنات مەوارۆ ئەسرین
مورغ کە بەردش شازادەی دڵڕێش
تا یاوا وە نەزد یاران جانیی وێش
ڕاز گوزەشتە تەمام بەیان کەرد
یاران شنەفتن کێشان ئاهـ سەرد
شازادە و یاران بمانۆ وە جاهـ
بەزاری و گرین بانگ واوەیلا
بشین وە سەروەخت خاتوون نازار
ڕوو کەرد وە ئیرەم بەسەد لەنجەولار