فڕاندنی نۆش ئافەرین بەدەستی عەلقەم دێو و بەندکرنی لە کۆشکی سولەیمان لە جەزیرەی موحیتدا
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
3 دقیقه
708 مشاهده
خامە نەغزکێش زەمانەی وەرین
بەی تەوربەیان کەرد جە نۆش ئافەرین
وەختێ بەرد مەلعوون شای نۆش ئافەرین
بەرد بەو جەزیرە موحیت پڕ کین
جەدمای چەندێ هەم ئاما بەهۆش
شۆخ شیرین ناز ماهـ قەسەب نۆش
هۆرێزا وە پا شای شیرین ئەنداز
هەم ئاما بە هۆش دیدە کەردش باز
دیش ها نە قەسر ساف بلوورین
بە وێنەی ڕەونەق فێردەوس بەرین
نەعەدڵ دەریا موحیت دیارەن
تا ئادەمیزاد ڕاگە سێ ساڵەن
هەفت تاقەن هەر تاق چون تاق ئەخزەر
یەک تاق جە تڵاو یەک تاق جە ئەحمەر
هەرچی مەیل کەری نەو قەسر خۆش فەڕ
حازرەن تەعام نەرووی خوان زەڕ
بورجان مەگڕێو چون بورج قەیسەر
تێشدا جەم بەستەن یاقووت ئەحمەر
(بەعد ئەز ئان باغ چون باغ بەهەشتە
چمان کە لیقای خواوەند ڕەشتە)
مێوە فراوان سەدهەزار گوونە
جە ڕەوزەی ئەعلا کەردەن نموونە
دیش نیشتەن دێوێ عەجیب شکۆهێ
بەدشکڵ و بەدڕەنگ مێسال کۆهێ
دوو برادەرش بەندەن بەلاوە
بە ئاداب جەلاش مدران وە پاوە
هەر سێ بەیەک بار نەرووی ئیحتیرام
بەنۆش ئافەرین کەردشان سەلام
دێو بەدسیرەت ئاما بە ئاواز
وات ئەی نازەنین شای شیرین ئەنداز
(مەشیۆ) خەیاڵ، ئەندیشە باڵ
تەشویش باتڵ ناوەری بەدڵ
گۆش بدەر بەمن بشنەوە ڕازم
بزانە مەتڵەب ڕازو نیازم
ئینە دووساڵەن گرفتار تۆم
بە جان و بەگیان خەریدار تۆم
ئەمن هەم فەرزەند ئەکوان دێوم
پەی تۆ دەردەدار خاتر پەشێوم
عەلقەمم نامەن جە ئەسڵ نەژاد
هیچ پەروام نییەن جە ئادەمیزاد
ئەی قەسر دڵکێش جامڕێز جامشەن
کاخ سولەیمان مەنشوور نامشەن
جەبەین دەریای موحیت ئیجادەن
دوور جە ئاشووب ئادەمی زادەی
ئەر مەکان و موڵک وێت نەخەیاڵەن
تا ئادەمیزاد ڕاگە سێ ساڵەن
دایم مەگێڵام پەی وەخت فرسەت
تا ئیمساڵ فرسەت بەدەستم نەکەفت
وەختێ تۆ ئامای بەسەرچەشمەی نۆش
من ئامام پەی تۆ بێ سەداو خرۆش
ئامام تۆم ئاوەرد بەی قەسر خۆشرەنگ
بنیشە تێشدا بە کەیف و ئاهەنگ
خاترت جەم بۆ زوڵف بۆ گوڵاو
مەر ئادەمیزاد شەو بوینۆ نەخاو
مەبۆ چەنی من بە شاد بنیشی
بە جوفت حەڵاڵ نازم بکێشی
نازەنین زاناش هیچ چارەش نییەن
بەعزێ حەرف مایەی ناعیلاجییەن
واتش ئەی عەلقەم بەڵێ بەیەک شەرت
موهلەت یەک ساڵ پا نەکەی غەڵەت
جەدمای یەک ساڵ بە ئارەزووی دڵ
مورادت جەلای من مەبۆ حاسڵ
دێو قەبووڵ کەردش ڕاز و مودەعاش
بەوێنەی غوڵام کەفت نەخاک پاش
وات ئەردەربارەم زەڕەیێ لوتفت بۆ
من بە دە ساڵە موهلەت دەم بە تۆ
دوڵبەر حەرف دێو یاوا بەگۆشش
ئەندەکێ تاقەت هەم ئاما هۆشش
ئەی ساز و بازە وە تالیع ئامان
نەی جا بمانۆ نە قەسر سولەیمان
بشین وە سەر وەقت پادشای بابۆ
مەوات واوەیلا فەرزەندم پەی تۆ