fiřandinî noş aferîn bedestî ’elqem dêw û bendikirnî le koşkî suleyman le cezîrey muḧîtda
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
525 views
xame neẍzikêş zemaney werîn
bey tewrbeyan kerd ce noş aferîn
wextê berd mel’ûn şay noş aferîn
berd bew cezîre muḧît piř kîn
cedmay çendê hem ama behoş
şox şîrîn naz mah qeseb noş
horêza we pa şay şîrîn endaz
hem ama be hoş dîde kerdiş baz
dîş ha ne qesir saf bilûrîn
be wêney řewneq fêrdews berîn
ne’edił derya muḧît dyaren
ta ademîzad řage sê sałen
hefit taqen her taq çun taq exzer
yek taq ce tiław yek taq ce eḧmer
herçî meyl kerî new qesir xoş feř
ḧazren te’am nerûy xwan zeř
burcan megřêw çun burc qeyser
têşda cem besten yaqût eḧmer
(be’d ez an baẍ çun baẍ beheşte
çiman ke lîqay xwawend řeşte)
mêwe firawan sedhezar gûne
ce řewzey e’la kerden nimûne
dîş nîşten dêwê ’ecîb şikohê
bedşikił û bedřeng mêsal kohê
dû biraderş benden belawe
be adab celaş midran we pawe
her sê beyek bar nerûy îḧtîram
benoş aferîn kerdişan selam
dêw bedsîret ama be awaz
wat ey nazenîn şay şîrîn endaz
(meşyo) xeyał, endîşe bał
teşwîş batił nawerî bedił
goş bider bemin bişnewe řazim
bizane metłeb řazu nyazim
îne dûsałen giriftar tom
be can û begyan xerîdar tom
emin hem ferzend ekwan dêwim
pey to derdedar xatir peşêwim
’elqemim namen ce esił nejad
hîç perwam nîyen ce ademîzad
ey qesir diłkêş camřêz camşen
kax suleyman menşûr namşen
cebeyn deryay muḧît îcaden
dûr ce aşûb ademî zadey
er mekan û mułk wêt nexeyałen
ta ademîzad řage sê sałen
daym megêłam pey wext firset
ta îmsał firset bedestim nekefit
wextê to amay beserçeşmey noş
min amam pey to bê sedaw xiroş
amam tom awerd bey qesir xoşreng
binîşe têşda be keyf û aheng
xatirit cem bo zułf bo guław
mer ademîzad şew bwîno nexaw
mebo çenî min be şad binîşî
be cufit ḧełał nazim bikêşî
nazenîn zanaş hîç çareş nîyen
be’zê ḧerf mayey na’îlacîyen
watiş ey ’elqem bełê beyek şerit
muhlet yek sał pa nekey ẍełet
cedmay yek sał be arezûy dił
muradit celay min mebo ḧasił
dêw qebûł kerdiş řaz û mude’aş
bewêney ẍułam kefit nexak paş
wat erderbarem zeřeyê lutifit bo
min be de sałe muhlet dem be to
dułber ḧerf dêw yawa begoşiş
endekê taqet hem ama hoşiş
ey saz û baze we talî’ aman
ney ca bimano ne qesir suleyman
bişîn we ser weqit padşay babo
mewat waweyla ferzendim pey to