hatnî ’elqemî dêw û birdinî noş aferîn
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
670 views
dadmen ce dest ey dunyay keçbaz
řojê hezar fen fîtne medo saz
ey dunyay bê şerit şay noş aferîn
çun medo be dest mel’ûn bê dîn
naga ce kirdar zemaney keçbaz
cew dem ce řûy ẍeyb destê bî diraz
destê pey bahoy dułber awerdiş
horkend nezemîn řifana û berdiş
şîrîn hawar kerd ne serçeşmey noş
xeylê feẍan kerd axir bî xamoş
dest berûy hewa berdiş we bała
fełek cedaẍiş perêş menała
kenîzan temam zarî mekerdin
lwan be dima ey xeber berdin
şa xeber zana duxter berdişan
hewa da neser tac zeř nîşan
ce yaney babo peyda bî xiroş
seda şî begoş çerx mînapoş
şa zarî mekerd pey ferzend wêş
ce řîşe mekend tata řîş wêş
ehil şar temam girdîn weyek bar
gird yeqey wêşan kerdin pare par
yekser welayet geda ta miskîn
zarî mekerdin pey noş aferîn
yekê çun mecnûn came kerdiş çak
yekê wêş meda ne řûy text xak
yekê bar we lêw hîcran keşîde
yekê merêza esrîn ne dîde
yekê nedaxiş ser ta pa sya
yekê ce ’eşqiş terk kerd dunya
yekê ẍełtan bî nepay eywanş
yekê xak mekerd we ban şanş
yekê ne hîcran herdem menała
yekê xak burc be dem memała
gişt neseray şa matem û zigar
mekerdin feẍan megrewan bezar
şazadey çîn xeber yawa pêş
to watî gyanş kerden řîşekêş
bew tewr giřey nar cergiş meda coş
meşnewa kizey cerg wêş begoş
ce ẍem menała û mesoza û mewat
ey nazenînim řoḧim bo fedat
megrewa û mewat leyl melawan
waweyla û zarîş menîşt we kohan
mewat fîdat bam şay noş aferîn
çun midaraten bedest le’în
îse ceko bo zułf û xał to
wacben pey min řû be kem neko
tîr hîcranit ne cergim to to
řast û çep pêwe cem bîyen koko
nedarû taqet ey bar sengî
nebo be ḧałim paşay ferengî
kê binyo şewan dest nebałînit
kê gêro bedest lîmoy narînit
bałay sewł asat nekam dyaren
ce seraperdey kam şehryaren
destax zencîr kam řeng řêwen
giriftar bend telîsim dêwen
îse ke tawis kam gułistanî
’endelîb şewq kamîn bûstanî
ya xo neperde şîşe nişînî
wêt penhan kerden be nazenînî
ey ḧerfe mewat daym be tîkirar
megêła besoz çwar goşey bazar
meşî be řawe her beyanş bê
her noş aferîn nezwanş bê
ga cedaẍ ẍem ga melûl bederd
gahê xak nişîn ga zarî mekerd
herçend mekerdin yaran diłdarî
ew farêẍ nebî negrye û zarî
herçend delalet mekerdin weneş
ahîr cergiş fîşter mebî geş
xan miḧemed wat xatirit cem bo
ey kare xeylê mexfî nemebo
ne hermekan bo zû mebo peyda
şêr nîhanîş mebo hweyda
sułtan îbrahîm bederd wêşewe
bimano pey cay cefakêşewe