hênanî feyazî ’abêd bolay şa bo řawêjkirdin lebarey noş aferînewe
From the Book:
Suɫtan Îbrahîm û Noşaferîn
By:
Khana Qubadi (1704-1778)
7 minutes
508 views
cedmay hefit řo wezîr nedîm
ekabir zadan cedîd û qedîm
wezîran watin tanebîn xecił
bişîn we bargay ’abêd kamił
watin ey ’abêd şah kîne co
perê ferzendiş řûy seḧra gêro
’abêd êd şineft horêza we pa
ama pey ḧerem seraperdey şa
şake êdiş dî horêza we pa
çenî ew ’abêd kerdiş merḧeba
şa wat ey ’abêd ferzendim ce kon
îse ne ey ca hîç nedaroşon
’abêd wat ey şa matem menîşe
pey noş aferîn ẍuse mekêşe
ce noş aferîn xatirit cem bo
besed ’îz we naz meyo welay to
mekêşe cefa cederd û daẍiş
nawerden zerer gułê nebaẍiş
ce dimay sê sał to mebî diłşad
bekam meqsûd mude’a û murad
sułtan îrahîm şazadey çînen
aşq bedîdar noş aferînen
meşo mawero merdane û dilêr
nebak ce dêwen ne perwaş ce şêr
ew merd piř zat ew bewr piř kîn
ew necat medo şay noş aferîn
şa wat ey ’abêd murşêd kamił
cekam mekanen cemîn peřey guł
amanen ’abêd ferzendim ce kon
îne yek heften hîç nedaro şon
’abêd wat ey şa saḧêb ’edił û dîn
ha celay ’elqem ew dêw le’în
ha ne cezîrey deryay bê saman
meşhûren namş kax suleyman
ferzend xast new qesir û baẍen
bełê bê demaẍ ne ew ca û baẍen
’elqem wêş çenî herdû birader
wêney ẍułaman midran dest nezer
feyaz be î’caz dest necîbiş berd
ce astîn ḧebîb tûtî ber’awird
durc negerden ce tełay zerden
wêney gerdenbend negerden kerden
îsim ’ezaym xeylê wend nerûş
çend ḧerf penhan, kerd aşnay gûş
tûtî da be şa wat ey şehryar
ba celay to bo tûtîy şekerbar
ba ce qefes bo îmşew be’aram
sakîn bo ce lat tûtîy xoş kelam
ferda şazadan temamî yekser
bawer be meclîs ḧazir ban yekser
eto biferma bwaçan pêşan
ey durc negerden tûtî berkeran
herkam dest kêşan durciş ber’awerd
tûtî xoş kelam çenîş beyan kerd
ewkes layeqî noş aferîne
meşo mawero wey serzemîne
padşa ejnî xeylê bê xoşdił
bosa dest û pay feyaz kamił
êd wat horêza ’abid kamił
şî be cagey wêş wêney deste guł
seḧer be ferman şay wala tebar
ferma şazadan gird bîn xeberdar
cem’ şazadan temam xas û ’am
awerdin ḧuzûr şay wala meqam
nyan perêşan kursîy zerînkar
şîn we ban kursî girtişan qerar
xan miḧemed çenî ḧemîd melaḧ
çenî şazadan besułḧ û selaḧ
tac zernîgar nyan nerûy ferq
qamet lelîbas cewahêrat ẍerq
ce menził wêşan hersê bîn řahî
yawan be meclîs baregay şahî
selam dan wesef nerûy şehryar
ḧemd xudawend danay kirdigar
wezîr û ḧemîd aman be guftar
kerdin senaxwan şay nîkukirdar
watşan ey şa dewłet bo îqbał
be ḧeq xuday bînay bê zewał
ey new cewane şêr kînexwah
midran beranberce ḧuzûr şah
ferzend ’ezîz ’adił şay çînen
aşq be dîdar noş aferînen
şa ke nîga kerd merdê dî we çem
be ketif û bazû bewêney řustem
her weqit bikêşo şimşêr neẍelaf
megurêzan ce bîm dêwan koy qaf
be ’eqił û kemał bezor bazû
kes nimezano we ham tirazû
şa xeylê xoşḧał perê kemałş
horêza ce text des girt webałş
(awerd be nezdîk nîşte cay wêş
xeylê tewazi’ çenî bikerdiş)
şazadan dîşan ḧesed meberdin
cerûy ḧeqaret nîgaş mekerdin
şa ferma tûtî ḧazir kerdişan
eweł be elyas ferma berdişan
şazade elyas tûtî ber awerd
girt bedestewe nîgay řengiş kerd
durciş řeha kerd nerûy gerdenş
esłen nebî deng kelam kerdenş
herçend lała lêş besed dax û derd
hîç seda nekerd tûtî şîrîn werd
elyas pey wêş be na’umêdî
meqsûdiş ḧasił nebî ce tûtî
hem melîk tûfan şêr zeberdest
dest awerd perê tûtî girt be dest
ewîş bew destûr durciş ber awerd
herçend lała lêş tekelum nekerd
tûtî awerdin pey melîk behmen
siperdin be dest şêr ercumen
durciş negirden tûtî řeha kerd
herçend se’î kerd sedayê nekerd
awerdin perê şazade se’îd
ewîş bew destûr bibî na’umîd
tûtî dan be dest şazade mes’ûd
şêr şêrangîr pêş nebî meqsûd
şazadan temam herçend mekerdin
dest bedurc zeř tûtî meberdin
be sed hezar terz çenîş kerdin řaz
esłen û qet’en nama be awaz
gişt matemîn bîn zewî û řojgar
serustin bezîr çun xecałetbar
tûtî awerdin bew nazenînî
siperdin bedest şazadey çînî
şazadey çalak gustax nerûy sef
tûtîy nazenîn nya nerûy kef
wat ey keremdar kerem bê payan
setar siřpoş sen’et numayan
umêdim be ton mulcay gişt eşya
tûtî çenî min bikerî gûya
ta nerûy meclîs nebûm şermesar
xecałet nebûm ce lay şehryar
dest berd perê durc gerden řeha kerd
durciş negerden tûtî ber’awerd
temam meclîs mekerdin niga
şazadan yekser çenî padşa
tûtî be ziban fesîḧ gûya bî
îbtîda ḧerfiş be bismîla bî
cew dima watiş, sultan îbrahîm
înşeła be feził îsim ’ezaym
mededkarten feyz nûr zat
to noş aferîn mederî necat
mawerît beşad netoy qesir kax
cifit to mebo be şadîy demax
mebî kamyab gułzar baẍiş
menîşî nepay şem’ çiraẍiş
tûtîy şeker řêz temam beyan kerd
şazadan ḧesret mekêşan cederd
enguşt ḧesret meberdin nedem
watî pare bîn ce pejare û ẍem
girdîn xeyał nedił mawerdin
be xeyał nîgay yektir mekerdin
tedbîrşan bî ce beyn wêşan
horêzan we pa şimşêr bikêşan
yekbare ḧemłe perêş baweran
şazadey çînî seringûn keran
baz ce bîm xof yaran nedaştin
çun ceng pîşîn beçem medaştin
sake êd şineft şay wala meqam
bey destûr tûtî temam kerd kelam
horêza ceban text zeřnîgar
dest kerd negerden şazadey salar
berdiş beřûy text zeřnîgar wêş
bosa dû dîdeş şah derûn řêş
watiş ey ferzend nûr dîdey min
řaz to ’abêd ḧałî kerd be min
to ney kar sext mederî necat
to noş aferîn mawerî wełat
to mekey fetiḧ dêwî bed îman
to meşî be kax qesir suleyman
ferzend mawerît noş aferînen
gişt ’alem perêş matem neşînen
şazade ce şerim ser wist bedaman
necewab şa nekerd kelaman
şazadan îbraz şineftin be goş
cergişan çun dîk sya meda coş
horêzan lwan be yaney wêşan
şah îltîfatê nekerd çenîşan
be ḧeremsera berdişan xeber
be lay qemernaz walîdey dułber
watin ke ey şêr nadrey cengen
bê xof cezaman mewday xedengen
ferzend ’ezîz padşay çînen
pey noş aferîn matem nişînen
şay noş aferîn bew nazenînî
meşo mawero şazadey çînî
qemernaz şineft kerdiş beşaret
ẍuse û dax û derd gişt da be ẍaret