هێنانی فەیازی عابێد بۆلای شا بۆ ڕاوێژکردن لەبارەی نۆش ئافەرینەوە
لە کتێبی:
سوڵتان ئیبراهیم و نۆشافەرین
بەرهەمی:
خانای قوبادی (1704-1778)
7 خولەک
697 بینین
جەدمای هەفت ڕۆ وەزیر نەدیم
ئەکابر زادان جەدید و قەدیم
وەزیران واتن تانەبین خەجڵ
بشین وە بارگای عابێد کامڵ
واتن ئەی عابێد شاهـ کینە جۆ
پەرێ فەرزەندش ڕووی سەحرا گێرۆ
عابێد ئێد شنەفت هۆرێزا وە پا
ئاما پەی حەرەم سەراپەردەی شا
شاکە ئێدش دی هۆرێزا وە پا
چەنی ئەو عابێد کەردش مەرحەبا
شا وات ئەی عابێد فەرزەندم جە کۆن
ئیسە نە ئەی جا هیچ نەدارۆشۆن
عابێد وات ئەی شا ماتەم مەنیشە
پەی نۆش ئافەرین غوسە مەکێشە
جە نۆش ئافەرین خاترت جەم بۆ
بەسەد عیز وە ناز مەیۆ وەلای تۆ
مەکێشە جەفا جەدەرد و داغش
ناوەردەن زەرەر گوڵێ نەباغش
جە دمای سێ ساڵ تۆ مەبی دڵشاد
بەکام مەقسوود مودەعا و موراد
سوڵتان ئیراهیم شازادەی چینەن
ئاشق بەدیدار نۆش ئافەرینەن
مەشۆ ماوەرۆ مەردانە و دلێر
نەباک جە دێوەن نە پەرواش جە شێر
ئەو مەرد پڕ زات ئەو بەور پڕ کین
ئەو نەجات مەدۆ شای نۆش ئافەرین
شا وات ئەی عابێد مورشێد کامڵ
جەکام مەکانەن جەمین پەڕەی گوڵ
ئامانەن عابێد فەرزەندم جە کۆن
ئینە یەک هەفتەن هیچ نەدارۆ شۆن
عابێد وات ئەی شا ساحێب عەدڵ و دین
ها جەلای عەلقەم ئەو دێو لەعین
ها نە جەزیرەی دەریای بێ سامان
مەشهوورەن نامش کاخ سولەیمان
فەرزەند خاست نەو قەسر و باغەن
بەڵێ بێ دەماغ نە ئەو جا و باغەن
عەلقەم وێش چەنی هەردوو برادەر
وێنەی غوڵامان مدران دەست نەزەر
فەیاز بە ئیعجاز دەست نەجیبش بەرد
جە ئاستین حەبیب تووتی بەرئاورد
دورج نەگەردەن جە تەڵای زەردەن
وێنەی گەردەنبەند نەگەردەن کەردەن
ئیسم عەزایم خەیلێ وەند نەرووش
چەند حەرف پەنهان، کەرد ئاشنای گووش
تووتی دا بە شا وات ئەی شەهریار
با جەلای تۆ بۆ تووتیی شەکەربار
با جە قەفەس بۆ ئیمشەو بەئارام
ساکین بۆ جە لات تووتیی خۆش کەلام
فەردا شازادان تەمامی یەکسەر
باوەر بە مەجلیس حازر بان یەکسەر
ئەتۆ بفەرما بواچان پێشان
ئەی دورج نەگەردەن تووتی بەرکەران
هەرکام دەست کێشان دورجش بەرئاوەرد
تووتی خۆش کەلام چەنیش بەیان کەرد
ئەوکەس لایەقی نۆش ئافەرینە
مەشۆ ماوەرۆ وەی سەرزەمینە
پادشا ئەژنی خەیلێ بێ خۆشدڵ
بۆسا دەست و پای فەیاز کامڵ
ئێد وات هۆرێزا عابد کامڵ
شی بە جاگەی وێش وێنەی دەستە گوڵ
سەحەر بە فەرمان شای والا تەبار
فەرما شازادان گرد بین خەبەردار
جەمع شازادان تەمام خاس و عام
ئاوەردن حوزوور شای والا مەقام
نیان پەرێشان کورسیی زەرینکار
شین وە بان کورسی گرتشان قەرار
خان محەمەد چەنی حەمید مەلاح
چەنی شازادان بەسوڵح و سەلاح
تاج زەرنیگار نیان نەرووی فەرق
قامەت لەلیباس جەواهێرات غەرق
جە مەنزڵ وێشان هەرسێ بین ڕاهی
یاوان بە مەجلیس بارەگای شاهی
سەلام دان وەسەف نەرووی شەهریار
حەمد خوداوەند دانای کردگار
وەزیر و حەمید ئامان بە گوفتار
کەردن سەناخوان شای نیکوکردار
واتشان ئەی شا دەوڵەت بۆ ئیقباڵ
بە حەق خودای بینای بێ زەواڵ
ئەی نەو جەوانە شێر کینەخواهـ
مدران بەرانبەرجە حوزوور شاهـ
فەرزەند عەزیز عادڵ شای چینەن
ئاشق بە دیدار نۆش ئافەرینەن
شا کە نیگا کەرد مەردێ دی وە چەم
بە کەتف و بازوو بەوێنەی ڕوستەم
هەر وەقت بکێشۆ شمشێر نەغەلاف
مەگورێزان جە بیم دێوان کۆی قاف
بە عەقڵ و کەماڵ بەزۆر بازوو
کەس نمەزانۆ وە هام ترازوو
شا خەیلێ خۆشحاڵ پەرێ کەماڵش
هۆرێزا جە تەخت دەس گرت وەباڵش
(ئاوەرد بە نەزدیک نیشتە جای وێش
خەیلێ تەوازع چەنی بکەردش)
شازادان دیشان حەسەد مەبەردن
جەرووی حەقارەت نیگاش مەکەردن
شا فەرما تووتی حازر کەردشان
ئەوەڵ بە ئەلیاس فەرما بەردشان
شازادە ئەلیاس تووتی بەر ئاوەرد
گرت بەدەستەوە نیگای ڕەنگش کەرد
دورجش ڕەها کەرد نەرووی گەردەنش
ئەسڵەن نەبی دەنگ کەلام کەردەنش
هەرچەند لاڵا لێش بەسەد داخ و دەرد
هیچ سەدا نەکەرد تووتی شیرین وەرد
ئەلیاس پەی وێش بە نائومێدی
مەقسوودش حاسڵ نەبی جە تووتی
هەم مەلیک تووفان شێر زەبەردەست
دەست ئاوەرد پەرێ تووتی گرت بە دەست
ئەویش بەو دەستوور دورجش بەر ئاوەرد
هەرچەند لاڵا لێش تەکەلوم نەکەرد
تووتی ئاوەردن پەی مەلیک بەهمەن
سپەردن بە دەست شێر ئەرجومەن
دورجش نەگردەن تووتی ڕەها کەرد
هەرچەند سەعی کەرد سەدایێ نەکەرد
ئاوەردن پەرێ شازادە سەعید
ئەویش بەو دەستوور ببی نائومید
تووتی دان بە دەست شازادە مەسعوود
شێر شێرانگیر پێش نەبی مەقسوود
شازادان تەمام هەرچەند مەکەردن
دەست بەدورج زەڕ تووتی مەبەردن
بە سەد هەزار تەرز چەنیش کەردن ڕاز
ئەسڵەن و قەتعەن ناما بە ئاواز
گشت ماتەمین بین زەوی و ڕۆژگار
سەروستن بەزیر چون خەجاڵەتبار
تووتی ئاوەردن بەو نازەنینی
سپەردن بەدەست شازادەی چینی
شازادەی چالاک گوستاخ نەرووی سەف
تووتیی نازەنین نیا نەرووی کەف
وات ئەی کەرەمدار کەرەم بێ پایان
سەتار سڕپۆش سەنعەت نومایان
ئومێدم بە تۆن مولجای گشت ئەشیا
تووتی چەنی من بکەری گوویا
تا نەرووی مەجلیس نەبووم شەرمەسار
خەجاڵەت نەبووم جە لای شەهریار
دەست بەرد پەرێ دورج گەردەن ڕەها کەرد
دورجش نەگەردەن تووتی بەرئاوەرد
تەمام مەجلیس مەکەردن نگا
شازادان یەکسەر چەنی پادشا
تووتی بە زبان فەسیح گوویا بی
ئیبتیدا حەرفش بە بسمیلا بی
جەو دما واتش، سولتان ئیبراهیم
ئینشەڵا بە فەزڵ ئیسم عەزایم
مەدەدکارتەن فەیز نوور زات
تۆ نۆش ئافەرین مەدەری نەجات
ماوەریت بەشاد نەتۆی قەسر کاخ
جفت تۆ مەبۆ بە شادیی دەماخ
مەبی کامیاب گوڵزار باغش
مەنیشی نەپای شەمع چراغش
تووتیی شەکەر ڕێز تەمام بەیان کەرد
شازادان حەسرەت مەکێشان جەدەرد
ئەنگوشت حەسرەت مەبەردن نەدەم
واتی پارە بین جە پەژارە و غەم
گردین خەیاڵ نەدڵ ماوەردن
بە خەیاڵ نیگای یەکتر مەکەردن
تەدبیرشان بی جە بەین وێشان
هۆرێزان وە پا شمشێر بکێشان
یەکبارە حەمڵە پەرێش باوەران
شازادەی چینی سەرنگوون کەران
باز جە بیم خۆف یاران نەداشتن
چون جەنگ پیشین بەچەم مەداشتن
ساکە ئێد شنەفت شای والا مەقام
بەی دەستوور تووتی تەمام کەرد کەلام
هۆرێزا جەبان تەخت زەڕنیگار
دەست کەرد نەگەردەن شازادەی سالار
بەردش بەڕووی تەخت زەڕنیگار وێش
بۆسا دوو دیدەش شاهـ دەروون ڕێش
واتش ئەی فەرزەند نوور دیدەی من
ڕاز تۆ عابێد حاڵی کەرد بە من
تۆ نەی کار سەخت مەدەری نەجات
تۆ نۆش ئافەرین ماوەری وەڵات
تۆ مەکەی فەتح دێوی بەد ئیمان
تۆ مەشی بە کاخ قەسر سولەیمان
فەرزەند ماوەریت نۆش ئافەرینەن
گشت عالەم پەرێش ماتەم نەشینەن
شازادە جە شەرم سەر وست بەدامان
نەجەواب شا نەکەرد کەلامان
شازادان ئیبراز شنەفتن بە گۆش
جەرگشان چون دیک سیا مەدا جۆش
هۆرێزان لوان بە یانەی وێشان
شاهـ ئیلتیفاتێ نەکەرد چەنیشان
بە حەرەمسەرا بەردشان خەبەر
بە لای قەمەرناز والیدەی دوڵبەر
واتن کە ئەی شێر نادرەی جەنگەن
بێ خۆف جەزامان مەودای خەدەنگەن
فەرزەند عەزیز پادشای چینەن
پەی نۆش ئافەرین ماتەم نشینەن
شای نۆش ئافەرین بەو نازەنینی
مەشۆ ماوەرۆ شازادەی چینی
قەمەرناز شنەفت کەردش بەشارەت
غوسە و داخ و دەرد گشت دا بە غارەت