řoyştinî şazade legeł cehangîrşa bo lay ’abêd
From the Book:
Suɫtan Îbrahîm û Noşaferîn
By:
Khana Qubadi (1704-1778)
4 minutes
596 views
şah û şazade herdû be î’zaz
şîn be sewmê’e baregay feyaz
kerdişan selam murşîd kamił
midran be xidmet be yeqîn û dił
’abêd horêza selam da cewab
wat ey şazade şay xeter xîtab
her dû nîştebîn nexdimet fyaz
yekê pey metłeb yekê pey nyaz
’abêd pey metłeb ama beguftar
wat ey şazade keyanî kirdar
mebo to ce řûy deryay bê saman
bişî bemaway kax suleyman
er sed mekêşî cefaw derdîser
mawerî beşad sewł nazperwer
midarat nebo bewext û bê wext
mekerî fetiḧ telîsmat sext
sê nefer řefîq yar hamřaten
wêney ẍulaman nexak paten
bełam yekêşan ne řûy xecałet
mekero xidmet ne řûy xeyanet
êd wat û dest berd tûtî ber’awerd
durciş negerdin tûtî řeha kerd
wat her weqit beyo muşkîłê neřêt
nîga ker nedruc me’lûm mebo lêt
herçê nwîsan ne řûy durc zer
se’î ker temam be encam bawer
ema sed zînhar şazadey bê xoş
be to mewaçim nekey feramoş
şay noş aferîn şîrîn diłkêş
mawerî we zêd welay baboy wêş
ce mułk ẍerîb genc şahaneş
neşkenî şîşey qufił xezaneş
pa ẍełet nekey şazadey diłşad
bełke xwawend biderot necat
şazade guftar ’abêd piř hoş
be şerit û îqrar kerd aşnay goş
êd wat horêza ce sewmî’ey xas
bosa dest û pay feyaz be’îxlas
cew dima ama be menziłgay wêş
řext û esbabiş awirdin we pêş
herçê lazim bê qaym kerd bewêş
mabaqî herçê lazim nebî pêş
berdin neseray şahî siperdin
siperde bedest qemernaz kerdin
’îzet xan wezîr cehangîr şa bê
wezîr kamił hem saḧêb ca bê
hefit pişten wezîr cehangîr şa bî
ce kar û kirdar wasîtey şa bî
şay noş aferîn nazdar şîrîn
pey emîr selîm nafiş biř bîn
ewsa mindał bî nazdar bawan
hem şîrexwar bî cepîstan dayan
wextê ke yawa be sin’ şahî
’alem şeyda kerd be diłrubahî
şay şîrîn demaẍ wêney peřey guł
emîr selîm hîç nekerdiş qebûł
’ezim sefer kerd sułtan îbrahîm
be firset zana wezîr le’în
watiş min mekirê bawerim wekar
sułtan îbrahîm nebo cêş řizgar
wezîr ’erz kerdiş şay wala tebar
metłebê darûm mekerûm îzhar
sułtan îbrahîm bê şerit û bê şon
kes nimezano meskenş ce kon
ba emîr selîm ferzend bende
’ebid dergaten be ser’efkende
wêney ẍułaman bibendo kemer
çenî şazadan bişo pey sefer
îstîd’a kerdiş ce şay bê endêş
řuxset tełeb kerd pey ferzend wêş
watiş ey ferzend şêr hunermend
aga ber ce wêt nawerî gezend
her weqit şazade dêwanş ker qest
şay noş aferîn awerdiş be dest
meracî’et kerd be xatir guşad
amawe û yawa be ademîzad
er firset zanay bikereş hîlak
welaşey bê ser bispareş we xak
cew dima çun êdşay noş aferîn
bawere pey wêt şox dił guzîn
şa ce îltîfat webê giftugo
şay noş aferîn mebexşo be to
selîm wat babo îne xeyałen
kuştey şazade emrê meḧałen
şêrê bey destûr piř xeşim û bê bak
kê zehre daro bikeruş helak
wezîr wat zeřey darûy helahêl
penhanim kerden pey řoj muşkêl
ne zîr nigîn penhanim kerden
hîç kes beguman řaş pê neberden
medom be destit biber çenî wêt
mexfî nehanî kes nezano pêt
hengam firset kes nebo celat
mexfî biřîze ne řûy te’amat
we’dey yek sa’et mebo sed pare
řoḧiş ce endam mebo aware
cew dima new ca to wêt memanî
ełbet ser’encam karit mezanî
ne ewdem nigîn ce dest ber’awerd
bedest ferzend naxelef siperd
ew namunafîq dêwaney deẍeł
zehirş penhan kerd mexfî ce beẍeł