řoştinî sułtan îbrahîm berew koşkî suleyman
From the Book:
Suɫtan Îbrahîm û Noşaferîn
By:
Khana Qubadi (1704-1778)
4 minutes
448 views
ey çerx ẍedar piř ce qebaḧet
kê nîşten têda satê be řaḧet
zuxaw cergiş be kê nenoşa
berg matemî be kê nepoşa
her ce ’arfan ta şehryaran
kê newist nemewc deryay hezaran
şazade û yaran řahî bîn beřa
pişt bestin be zat yektay bê hemta
tey kerdin řahan seḧra û byaban
lwan ta çendê be meẍrîb yawan
nîştin ne keştî kerdişan şêtab
bemudey sê mah wiyerd ne řûy ab
sê mah wiyerdin ce ab tîre
nîga kerdişan dîn yek cezîre
persan naxuda îne çi cahen
ye cezîrey baẍ kam padşahen
watiş cezîrey koya namşen
şahan ḧesretmend pey dîdarşen
bełê cagey bewr caneweranen
girdîn ademxiwar nam aweranen
ca girten têda canewran çend
însan meweran çun badam qend
şazade watiş min meşûm bew ca
canewran gişt mekerûm teba
naxuda watiş cey wer kê dyen
ey kare ke kar kerdenî nîyen
her kes ce werto şîyen be ewca
hîç kes nedyen naman û dima
çend şehryaran saḧêb zorusam
gişt newqesir û baẍ yekser bîn temam
şazade ḧerfiş hîç qebûł nekerd
teşrîf be mesken canewran berd
* daxił bîn be baẍ cezîrey piř guł
mebî ḧeyranş diłê ne hezar dił
baẍê dîn çi baẍ ’eceb gułzarê
nîyen neseray hîç şehryarê
mîwey řengaw řeng be hem peyweste
řenga, řeng (lu’lu’) guł deste deste
hefit burc hatêşda çun burc exzer
cagey piř sefa dêwî bedgewher
cenaga seday dûrbaşan xêza
ce dûrbaş dûrbaş ’ałem mexêza
dîşan ke dêwê ama pedîdar
ne pehlûş meyo çend dêwî xûnxiwar
şest hezar nefer dêwî cadûkar
seday ne’rete çun ebir behar
yekê ce dêwan qed wêney minar
dest û pa çun fîl enguşt çun xyar
gerdenş wêney şitur diraz bî
dindanş wêney (surfe) y guraz bî
ẍuřa be heybet mel’ûn le’în
watiş îbrahîm şay çîn û maçîn
pey çêş amanî wey cage û mekan
her kesê aman saf bîyen bê gyan
me’lûm ke ecel eto awerden
wey mekan min arezût kerden
sa ke êd şineft bewr deng dilêr
xêza necage tekan da çun şêr
watiş ey mel’un dêw bed gewher
er mubarêzî pa binye newer
be tofîq ḧeq dehendey dawer
îse cemeydan memanî bê ser
xeyałit kerden çend şehryaran
herkes ke aman kerdenit bê gyan
emin îbrahîm şêrî kînecom
qabiz erwaḧ mewt merg tom
sa ke êd şineft dêwî kîneco
bułend kerd ne’ewc gurziş wêney ko
ce giřey gurziş encum gurêza
fewc fewc nerûy ewc mela’îk xêza
şazade êd dî esperda neser
muḧafêzet kerd dehendey dawer
çun koh elburz awerd neserda
daş neser qube ew sedir esperda
bew tewr da neferq şazadey bê xoş
hûnîn bî temam bînî û çeşim û goş
gîcawgêciş werd kefit netext xak
ẍełtan be xûn bî şêr sîne çak
horêza ne řûy text xoł û xak
des da be sator bewr sîne çak
da ne ferq ser dêw bedkirdar
şeqiş kerd ta naf bewêney xyar
kefit nerûy zemîn ’emirş şî we bad
řoḧiş be duzex cehenem bî şad
sipa we yek bar hicûm awerdin
şazade û yaran êḧate kerdin