هاتنی شازادە بۆلای نۆش ئافەرین
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
1 دقیقه
724 مشاهده
دیسان هەم جە نەو شازادەی خوونخوار
کەردش ئارەزووی گوڵباغچەی گوڵزار
ناگا شازادە جەمین دەستەی گوڵ
پەیدا بی ئاما چۆن بەدر کامڵ
سەلام کەرد نە ڕووی شای نۆش ئافەرین
واتش سەد عەلەیک ئەی جان شیرین
وات جانم فیدای ماوا و وڵات بۆ
دیدەم پایەنداز جای قەدەمگات بۆ
باڵام پایەنداز سەرو نازت بۆ
سەرم فیدای دەنگ شنۆی ڕازت بۆ
موژەی چەمانم جاڕووبی پات بۆ
ڕۆح وگیان و عومر سەرگەرد ڕات بۆ
سەرگەرد ڕات بام هەرچ ڕەزاتەن
عەدڵ بیناییم جای قەدەمگاتەن
شازادە واتش ئەی گوڵ جەمینم
من فیدای تۆبام ئەی نازەنینم
ئەی ڕاز و واتە مەکەر وە پێشە
بەلەنجە و غەمزە جەرگم مەکێشە
ئێد موات گاگا لەعل لەبانش
مەبۆسا پێوە کام و زوبانش
با شازادە و دۆست زوڵفان عەنبەرین
نەی جا بمانۆ بەرازی شیرین
ئەر سەد ڕازشان نمەبۆ تەمام
حەرفێ بواچووم پەرێ خاس و عام