خواستگاری ابن السلام مرتبە دوهم لیلی را
از کتاب:
لەیلا و مەجنوون
اثر:
خانای قبادی (1704-1778)
4 دقیقه
779 مشاهده
سەعد ئیبن مونیف، ئەو ئیبنوسەلام
ئاما وە سەر کار، خولاسەی کەلام
بە عەزم ڕاسخ عەرووسی خواهی
بە سەد تەمتراق، تەنتەنەی شاهی
گەنج و خەزێنە، گەوهەری شەهوار
عەنبەر وە باتمان، شەکەر وە خەروار
پەی حەمڵ پێشکەش فروش زیبا
چەند بڵند ئوشتوور جە زێڕ و دیبا
جە بەختەو بوختی و تازی تەکاوەر
ئەوەند عەقڵ خەڵک پێش نەبۆ یاوەر
جە زەڕ مەردوم بە گیان مەستێزۆ
مەڕێزا هەر وەک خاشاک بڕێزۆ
ئەوەند گەنج و ماڵ بە نیکوو عەهدی
کیانا وە عەزم دەربار مەهدی
مەهدی هۆرێزا بە شادمانی
گوشاد کەرد کلید شیرین زبانی
وات ئەی شەهسوار، بەور شێر پەیکەر
هەم پەنای عەرەب، هەم پشت لەشکەر
ساحێب تێغ کین هەم بڵند نامەن
ئەسباب بزورگ شاهیش تەمامەن
ئەر واچی هوونەن، چون ئاو مەڕێزۆ
ئەر مەواچی زەڕ چون تاو مەخێزۆ
بە خوا ناخواهی، جە ڕای پڕ مەیلی
ئەوسافش مەدا بە سەمع لەیلی
هەرچی مەواتش، لەیلی جە داخان
مەفرووزا چون شەمع وادەی چراخان
جەبرەن مەیلش دا بە دنیا و زەڕ
لەیلش دا بە سەعد سەوڵ خاتر تەڕ
جە شار و بازاڕ بەستشان ئایین
بە شەرع ئیسلام لێش کەرد وە کابین
عەقد و ئیزدیواج، نیکاح لەیلێ
بە میهرییەی خاس جە دینار خەیلێ
نیاشان بەسات ئەساسەی شادی
ئایین عەرووس، ڕەسم دامادی
جە شیربەهای ئەو زەڕدا وە دامان
تۆفان تەڵا، شی وە ئاسمان
ئاهووی ماهی تەرز جە دەست کەرد ڕەها
مانگ سپەرد وە کام دەمی ئەژدەها
مەشاتان خەیلێ پەرێ ئارایش
هەر یەک بە تەورێ داشان نمایش
هەرچەند لەیل موحتاج مەشاتە نەبی
لازم بەو بەزم و بەساتە نەبی
بە ڕەسم ئایین دەورەی جەهانی
پەنهان کەرد جە دڵ ڕاز نەهانی
واتش نەمەبۆ ئی کارە کەردەن
پاگیر بۆم یا خۆ بشۆم وە مەردەن
وە لیباس خاس دیبای شاهانە
ڕازیا عەرووس خاترخواهانە
بە زاهیر عەرووس، باتن عەزادار
شی وە کەژاوە لەیل وەفادار
ڕاهی بی وە ڕا زەڕین عەماری
بە عیزز و شکۆهـ و بزورگەواری
ئەوڕەنگ سەریر وێش ابن السلامعربی
بەخشاوە لەیلێ خولاسەی کەلام
وە چەرب زبانی مەکێشا ڕەنجش
بەڵ باوەرۆ دەست کلید گەنجش
لەیلێ وات بە سەعد مونیف بن سەلام
قەسەم وە جەلال ملك العلامعربی
بەو فەرد وا چوون وا تەنیا و تاکەن
ئەوەڵ دۆسم قەیس ئاخرم خاکەن
شەرتم ئەو شەرتەن پەی قەیسم کەردەن
بازگەشتیم نییەن تا بە ڕۆی مەردەن
بابۆم زۆرش کەرد بە تەماع زەڕ
جەبرەن بە تۆ دان لەیل خاتر تەڕ
حەرامم بە تۆ خودا عالمەن
شاهد و قازی و وەلیم زاڵمەن
دەست بەردار نەبی، وە دەشنەی هوونڕێز
ماوەرۆم جە بێخ نەهاڵ نەوخێز
چون ئیبنی سەلام ئەژنی ئی سەوگەند
هەر وە سەلامێ جەو مەبی خورسەند
چون دڵدادەیە، لەیلێ چون مەجنوون
پاسداریش مەکەرد چون دوڕ مەکنوون
بە ڕەسم دیدەن بە شکۆهـ و فەڕ
گاهـ گاهێ مەدیا سەوڵ خاتر تەڕ
بە دیدار مانگ بەدر دوو هەفتە
شاد مەکەرد دەروون دڵ جە دەس ڕەفتە
خورسەند بۆ بە ئەو بە یەک نزارە
خاستەر جە ئێدەن گێرۆ کەنارە
واتش بنیشە بە دڵ فەراغێ
مەزانۆم غەیر من هەنت چراغێ
وە یەک نزارە جە تۆ دڵشادم
ئەر درۆ واچۆم من حەرامزادم
عەیبەن جە فەرمان بابۆ شەوهەرت
سەرپێچۆ زاهیر بڵند گەوهەرت
لەیلێ قبووڵ کەرد یەک تەجدیدنەزەر
مودەتێ جە ئی دنیای زوودگوزەر
ئەو زینەت باغ، ئەو زینەت گوڵشەن
نیا وە ڕاوە دوو دیدەی ڕەوشەن
بەڵکە بو یارۆ یەک ڕاو یارێ
باوەرۆ خەبەر جە یار غارێ
بە نەوحە و زاری جە هەر گوزەرگاهـ
ماما وە بیروون جە خەیمە و خەرگاهـ
چەند قەدەم مەشی بە وێنەی مەستان
مەوانا ئەشعار چون هەزار دەستان
مەپەرسا هەواڵ جە یار مەهجوور
تەئسیرێ مەداش وە گیان ڕەنجوور
گاهێ بە تەریق دڵ ناسەبوری
مەناڵا جە دەرد جە داخ دووری
ئەو عشق بەنهان چوون بی هووەیدا
ڕازش جە دەروون لەیل مەبی پەیدا
هۆر مەدارا بانگ جە ناشەکیبی
جە بابۆ شەوهەر نەبیش نەهیبی
کەسێ بە عەشق بۆ سرشتەی گەوهەر
بێ باکەن جە بیم شەوهەر و پدەر
خانا عاشقی دەروون بێ دەوان
خۆشا عەشق حەق دوور جە ماسیوان
خۆشا بەو کەسان عوششاق حەقەن
فەریفتەی فەرمان فەرد موتڵەقەن
بە واتەی ڕەسووڵ بە حەق مەفتوونەن
جە سەحرای سلووک وێنەی مەجنوونەن