خانای قوبادی و مەحروومی و هەڵسەنگاندنی مەولەوی
از کتاب:
دیوانی خانای قوبادی
اثر:
خانای قبادی (1704-1778)
1 دقیقه
1143 مشاهده
خانا:
بەرق سەیف ناز، ئەبرۆ خەمینان
عەکس ماوی خاڵ خورشید جەمینان
ئەر بگنۆ وە کۆی قولەی قەزاڵە
مەکەرۆش وە بووڵ سفتەی سەد ساڵە
مەحروومی:
بەرق بەرقەی ناز عیشوەفرۆشان
چەخماخەی لەنجەی تەڵا نە گۆشان
بزیسکەی نیگای دیدە شابازان
بریقەی غەمزەی شەکەرین ڕازان
ئەر بگنۆ وە سەنگ جای تەجەلای نوور
مەکەرۆش وە گەرد، چوون سورمەی کۆی توور
مەعدووم ڕاس خاناتخلص سۆزان عەشق بی
کەی وێنەی مەحرووم، هەر عەشقش مەشق بی؟
هەڵسەنگاندنی مەولەوی:
نەوباوەی خەیاڵ، مەحرووم دانا
ڕەدیف لەتیف، زەریف خانا
یاوا وە دیدەی کەمبینام ساوا
جە نەو بینایی پەی دیدەم یاوا
پەیڕەویی خانات یاد ئاوەردە بێ
ئەو ئەسڵ و وێت فەرع حەساو کەردەبێ
لاکین زادەی تەبع بۆ عەنبەرینت
دەسڕێسەکەی فیکر بیکر شیرینت
پەسەندیدەی فام عەقڵ دانا بی
خاستەر جە خەیاڵ خاسەی خانا بی
زیادە پەی فەرع، وە سەر ئەسڵەدا
خاسەین واتەی تۆن جەی سەرفەسڵەدا