گەنجینەی مەردان

ئەم گەنجینەیە گەنجێ نییە زێڕ و زیو و جەواهیری تیابێ، بەڵکوو گەنجێکە سەدهەزار بەقیمەتتر لە موجەوهەراتی تیا نووسراوە. خەزنەی مەردانە، گەنجی پیاوانە، ئەو پیاوانەی کە گوڵی باغی ئینسانییەت و مەردی بوون، بە کرداری جوان جوان ڕازاونەوە و خزمەتی بەشەریان لەسەر شان ڕاگرتووە و تەماشایەکی قیامەتیشیان کردووە. لە هەموو عەسرێکا مەرد زۆر بووە و دائیمەن هەیە، ئەمما هەموو مەردێ ئەو خزمەتە نابینێ وەک ئەمانەی لە «گەنجینە»دا نووسراون و ئەمسالشیان زۆر بووە و قابیل نییە یەکە یەکە هەمووی بنووسرێ، چونکە ئەوە باری وشترێ کاغەزی ئەوێ. بۆ نموونە و دەرسی ئەخلاق بۆ خوێندەواران چەند زاتێکم نووسیوە کە ناویان تازە بکەمەوە، باوجوود لە گۆشەی تەئریخدا هەر یەکەو کەوتووەتە ناوەوە. من ویستم چەند مەردێ لەم نامیلکەدا بەیەکەو بنووسم، ناویان تازە بکەمەوە.