بەیانی
از کتاب:
دیوانی فایق بێکەس
اثر:
فایق بیکس (1905-1948)
1 دقیقه
965 مشاهده
بەیانییە، وا ڕۆژ هەڵات
شەو پشتی هەڵ کرد و هەڵات
چیا و دۆڵ و دەشت و دەر
بەرگی ڕووناکیی کردە بەر
زەمین دەمی بەپێکەنین
وەک دولبەرێکی نازەنین
پڕ گوڵ و پڕ لە یاسەمین
پڕ ئەرخەوان و نەستەرین
پەڕندە وا بەدارەوە
بەسەر لقی چنارەوە
بەبولبول و هوزارەوە
بەدەشت و کۆهسارەوە
مەستە خەریکی خوێندنە
ئەڵێ: چ وەختی نووستنە
خەریکی یاری کردنە
هەستە دەم و چاوت بشۆ
کتێبت هەڵگرە و بڕۆ
بۆ مەکتەبت خێرا بچۆ
لە ئێستەوە هەوڵ بدەن
چاوی لە ئێوەیە وەتەن