ئەستێرە گەشە
از کتاب:
دیوانی فایق بێکەس
اثر:
فایق بیکس (1905-1948)
1 دقیقه
1204 مشاهده
ئەستێرە گەشەی بەحەواوە
سەرم وا لەتۆ سووڕماوە
هەر سەیرت ئەکەم تێ ناگەم
کێ تۆی لەو جێیە داناوە؟
***
بەشەو کە دێمە سەربانی
سەیرت ئەکەم لە ئاسمانی
لەناو فەزای شین و جوانی
جریوەت دێ تا بەیانی
***
بۆیە وا شاد و مەسرووری
سەربەست و بەرز و ڕووسووری
دائیم دڵ ڕوون و پڕ نووری
چونکە لەم دنیایە دووری
***
خۆزگەم ئەمەیە ئێستە تۆ
بهاتیتایە گفت و گۆ
شەرحت بکردایە لەبۆ
منی هەژاری دەس خەڕۆ
***
بەردی، درەختی، یا بەشەر؟
ئەڵماسی، زیوی، یا گەوهەر؟
گیرەوەی تۆم و پڕکەدەر
پێم بڵێ زوو بەموختەسەر
***
جوابی دامەوە کەوا
کورەیەکم لەناو فەزا
بەئەمر و قودرەتی خودا
ڕاوەستاوم لە ڕووی سەما