ڕووناکیی چاوم ئەحمەدی سەیفی
از کتاب:
دیوانی سەیفولقوزات
اثر:
صیف القضات (1876-1945)
2 دقیقه
974 مشاهده
ڕووناکیی چاوم، ئەحمەدی سەیفی!
لە شیعر گوتنت دیارە بەکەیفی
کەیفت لە سایەی «حەزرەتی قازی»؟
وەقتێک لێت ڕازیم «قازی» بێ ڕازی
لە شیعر گوتنت زۆر کەیفخۆش بووم
چونکە ناخۆش بوو خەتت، نەخۆش بووم
زیاتر هومێدم هەر بۆیە پێتە
«سەدر»یشت ئوستاد، گوێی لە دەرسێتە
ئەگەر حەز دەکەی هەر سەرفەراز بی
لە باب و برات هەر بێ نیاز بی
ئەخلاقت چاک کە، بۆخۆت بخوێنە
درۆیان مەکە، کەمان مەدوێنە
لە سایەی «قازی»، جێژن پیرۆزە
جێژنی مە قوربان، نەکوو نەورۆزە
سایەی لەسەرمان یاخودا کەم نەبێ
دنیامان هەیە گەر ئەومان هەبێ
ئەنعامت ویستبوو، ئەوا بۆم ناردی
دۆعام بۆ بکە، بەخودام ئەسپاردی
ئەنعام بە عەدەد چوار یاری نەبی
بووبەکر و عومەر، عوسمان و عەلی
تا لێت یەقین بێ، هەر چوار بە حەقن
گوێ مەدە خاڵان، عەجەم ئەحمەقن
لەبەر بێ پووڵی دنیا بێ ڕەنگە
چ وەقتی سەعات، ئەو زرینگە و زەنگە؟
هەمیشە بەرگت، هەر فاسونیا بێ
مەرگت نەبینم، زەرد یا سیا بێ
خێزانی ماڵێ ئارەزووت دەکەن
مەیلی هاتنی زووبەزووت دەکەن
دۆعای گەیاندبووم «عەزیزی مامەش»
زۆرم پێ خۆش بوو، لە دڵم بڕا غەش
لە نێو مامەشان مەزن «عەزیز»ە
سوارێکی شۆڕ و شۆخ و تەمیزە
ڕان و ڕکێفی دەڵێی ڕۆستەمە
لە مەیدانێدا شێری بێ غەمە
دۆستی و ڕاستی و هەم عەهد و وەفا
هەرچی خووی چاکن، بە بابی بڕا
تا نێوی کوردان بە چاک بمێنێ
حەسەنتخلص لەلاوە نێوی وی دێنێ