نەورۆز گوڵ خێزان
از کتاب:
دیوانی سەیدی
اثر:
صیدی (1785-1849)
2 دقیقه
1454 مشاهده
نەورۆز گوڵ خێزان، نەورۆز گوڵ خێزان
وادەی وەهارەن، نەورۆز گوڵ خێزان
بەدەن کافووران، خاڵ خوردە ڕێزان
پۆشان مایەی عەتر بۆی عەنبەر بێزان
نەورۆز گوڵ جاسووس گوڵانی تازەن
وەهار کیانان، مزانی وازەن
بافتەن پەی زینەت ڕەندانی دوڵبەر
چوون جوقەی تاوس بپێکان وە سەر
قاسد نەورۆزان نەپای هەردەوە
یەک یەک بەر ئامان نەتۆی پەردەوە
هێمای خۆ زمسان تەشریف نەبەردەن
نەورۆز گوڵ موژدەی وەهار ئاوردەن
مزانی بدۆ زومستان ویەرد
تەختی یەخ بەندش هەوادا بە گەرد
ئەر سەد کە هەوای سەردیش بەرۆ تەن
خورشید مەنزڵگاش نە بورجی حوتەن
بەڵێ، جاڕ چیان نەورۆز جاڕ مەدان
جاڕی پادشای نەووەهار مەدان
بادی وادەی وەشت جە کۆسار مەیۆ
یاران مزانی، نەووەهار مەیۆ
پادشای وەهار وادەی وەختشەن
بە تەعجیل مەیۆ، ئامای جەختشەن
وەختەن شای وەهار بنیشۆ نە دەور
جاڕ بکێشۆ ڕەعد، تەمەلوول و هەور
وەختەن بگێرۆ ڕووی دەشتی سارا
کەوکەبەی وەهار وێنەی شای «دارا»
وەختەن بەیۆ بەر ئوردووی گوڵاڵان
گێران دەرو دەشت، چوون هەردەی جاران
وەختەن برۆسان گوڵان هەزار ڕەنگ
چەرمە و زەرد و سوور، چوون دێبای فەرەنگ
وەختەن شای وەهار بکیانۆ خەڵات
سەوزی ئەتڵەس ڕەنگ پەی ڕووی سەر بیسات
وەختەن «شەقایق» سەر باوەرۆ بەر
هۆردۆ ئاڵای سوور جە باڵای کەمەر
وەختەن بوڵبوڵان جە شیرین خاودا
بیدار بان جە موڵک خاسەی «زەهاو»دا
وەختەن ساڕێش بۆ خاترشان جە داخ
کەت بنیان بە عەزم گوڵ گەشتی «لەیلاخ»
فەسڵی نەووەهار وەختی گوڵ گەشتەن
سەر زەمین بە ڕەنگ سارای بەهەشتەن
وەختی شادی و عەیش ئەیامی سەیرەن
پەنەش دڵشادەن، ئەر وەحش، ئەر تەیرەن
ئەگەر خاترێو ناچاخەن، زویر
وەهار بێ کەیفیش مەبەرۆ جە ویر
چونکە شای وەهار شادی مەوازۆ
هیچ کەسێ خەمناک، مەلوول، نمازۆ
سەیدیتخلص چوون مەلوول هیجرانی یارەن
فێشتەر خەمناکیش فەسڵی وەهارەن