newroz guł xêzan
From the Book:
Dîwanî Seydî
By:
Seydi (1785-1849)
2 minutes
1456 views
newroz guł xêzan, newroz guł xêzan
wadey weharen, newroz guł xêzan
beden kafûran, xał xurde řêzan
poşan mayey ’etir boy ’enber bêzan
newroz guł casûs gułanî tazen
wehar kyanan, mizanî wazen
baften pey zînet řendanî dułber
çûn cuqey tawis bipêkan we ser
qasd newrozan nepay herdewe
yek yek ber aman netoy perdewe
hêmay xo zimsan teşrîf neberden
newroz guł mujdey wehar awirden
mizanî bido zumistan wiyerd
textî yex bendiş hewada be gerd
er sed ke heway serdîş bero ten
xurşîd menziłgaş ne burcî ḧuten
bełê, cař çyan newroz cař medan
cařî padşay newwehar medan
badî wadey weşt ce kosar meyo
yaran mizanî, newwehar meyo
padşay wehar wadey wextişen
be te’cîl meyo, amay cextişen
wexten şay wehar binîşo ne dewr
cař bikêşo ře’d, temelûl û hewr
wexten bigêro řûy deştî sara
kewkebey wehar wêney şay «dara»
wexten beyo ber urdûy gułałan
gêran deru deşt, çûn herdey caran
wexten birosan gułan hezar řeng
çerme û zerd û sûr, çûn dêbay fereng
wexten şay wehar bikyano xełat
sewzî etłes řeng pey řûy ser bîsat
wexten «şeqayq» ser bawero ber
hordo ałay sûr ce bałay kemer
wexten bułbułan ce şîrîn xawda
bîdar ban ce mułk xasey «zehaw»da
wexten sařêş bo xatirşan ce dax
ket binyan be ’ezim guł geştî «leylax»
fesłî newwehar wextî guł geşten
ser zemîn be řeng saray beheşten
wextî şadî û ’eyş eyamî seyren
peneş diłşaden, er weḧiş, er teyren
eger xatrêw naçaxen, zwîr
wehar bê keyfîş mebero ce wîr
çunke şay wehar şadî mewazo
hîç kesê xemnak, melûl, nimazo
seydîPen name çûn melûl hîcranî yaren
fêşter xemnakîş fesłî weharen