سەڵوی باد بەردە
از کتاب:
دیوانی سەیدی
اثر:
صیدی (1785-1849)
2 دقیقه
1080 مشاهده
سەڵوی باد بەردە، سەڵوی باد بەردە
میحنەت زەدەی دەرد، سەڵوی باد بەردە
بە ناڵە و گریان چوون ئازیز مەردە
پەی چێش ڕێزانی، دەرون بێ دەردە؟
وات جە دیدەی بەد من پێم نەیاوان
خەتای کەس نیەن، جە وێمەن تاوان
ڕوێ من مەشغوڵ بە قیامم بێ
سەر مەستی باڵای وەش ئەندامم بێ
من جە وەشی و زەوق، شەماڵ وەپای هەرد
پەی پەی جە قیام بەرگی خەمم بەرد
پێسە مەزانام جە ڕووی دونیاوە
نەمەردان چوون من هیچکەس بە پاوە
قەمەر ڕوومەتێ، دیدە سیایێ
موژگان نەشتەر ساو، حەیران دیایێ
بە سافی جەمین وێنەی جامی جەم
باڵا چوون سەرو گوڵ غونچەی ئیرەم
بە سەد ناز چوون حوور مەخێزۆ بە قەست
تا بازاڕی حوسن من بدۆ شکەست
خێزا شوعلەی نوور وەختێ هۆرێزا
بە خێزیاییش ڕەستاخیز خێزا
دیم پێچان نە دەور بەژن و باڵای وێش
دارایی و قوماش، ئاڵ و واڵای وێش
باڵا چوون ئاڵای سەرئەفرازی وێش
شێوە و لەنجە و لار، خەمزە و نازی وێش
حەیرانی ئەو بیم من وێم شی جە ویر
پی تەور بیم خەمناک، پەژارە و دڵگیر
ئەو خەزان سەڵوێ، من پا بەندی گڵ
من کۆگای خەمان، ئەو دەرمانی دڵ
خەیلێ تەماشای باڵای ئەو کەردم
داخی زەریفیش نە دەروون بەردم
ئەوسا چەو دما گرەوام، ناڵام
تا باد بدۆ باد شکستی باڵام
نەبا ئەو باڵا، نەمامی نەوخێز
یاران بوینان من وزان وە بێز