دۆستەم لڤۆ
از کتاب:
دیوانی سەیدی
اثر:
صیدی (1785-1849)
2 دقیقه
1101 مشاهده
دۆستەم لڤۆ، ئاستۆش جیا، ئاخ چێش کەرو، بێ یار خوێم
داخێش گرد ئینێ دڵمەنێ، هەرتا مروو داغدار خوێم
کەسڵەم نیۆ یادێم کەرۆ، دالێوە خەمخوارێم کەرۆ
کێ شیوەن و زاریم کەرۆ، پەی کۆ ملوو، بێ یار خوێم
کۆمیۆ نەبێ دادم کەرۆ، لاو دۆستەوە یادم کەرۆ
بەڵکوم زەڕێ و شادم کەرۆ، دادو مەدەد، هاوار خوێم
ئەر من گنێم چەمڵەم چەمێش، چی ئیندە کێشێنێ خەمێش
شەربەت وەرێنێ چا دەمێش، وێم خاس کەرێنێ چار خوێم
ڕەنگەم جە بەروە سوورەنە، بێ دۆست زێڵەم نوورەنە
ڕازەم درازو دوورەنە، تەن شقڵەوو بیمار خوێم
هاوارمۆ پەی تە زەڕین، دڵ مەبیە ئەڤداڵ و بەرین
وێڵ و کەش و کۆو وەر مەڕین، سەر سۆمەنوو سادار خوێم
کەم تاڵەناو، ئیقباڵ خراب، کەردم سڵۆم نەبێت جواب
زێڵ و منت گێرە کەباب، مەگنۆم وەنە، بێ عار خوێم
سا دەم پەنە تەڵێ و ڕیۆن، قیمەتشەنە سۆنەم گیۆن
چی مامەڵە مەگنۆم زیۆن، گاماوە ڕوو ئیکرار خوێم
خەمڵەم فرە، شادیم کەمۆ، سینەم بیەن کۆگاو خەمۆ
گرد دەردو دووری تۆ مەنوو، زامۆتەوە یەکجار خوێم
تۆ مەی، ملی، یاگێو تەری، پەی چێش ترێز جە من کەری؟!
ئیمۆنوو من گردی بەری، بێ قەدرو سووک و خوار خوێم
سا بۆرێ لام، ئەندازە کەرە، دەنگت وەش و ئاڤاز کەرە
دالێوە خەمزە و ناز کەرە، ئەز بۆ فدێت نازدار، خوێم
سەیدیتخلص لنو بۆڵ و فەقیر، عەشق و جوڤۆنا گێرە پیر
چنگ و خەمۆڤە وارە گیر، خەمکێشەڵ و غەمبار خوێم