دڵبەرم دیسان لەگەڵ من عاجزی و قینی هەیە
از کتاب:
دیوانی ئەحمەد موختار جاف
اثر:
احمد مختار جاف (1896-1935)
1 دقیقه
925 مشاهده
دڵبەرم دیسان لەگەڵ من عاجزی و قینی هەیە
بۆیە دیدەی ئەشکبارم ئارەزووی شینی هەیە
ئەو گوڵاڵەی وا لە کێوی بێ سنوورتا سەوز ئەبێ
چەن لەتیف و ئاڵە ڕەنگی لێوی شیرینی هەیە
ڕوومەت و خاڵت لە پێش چاوم نیگاری نازەنین
هەر لە عەینی ڕەنگی ماهـ و شکڵی پەروینی هەیە
من کە دیم تاقی دوو ئەبرۆی قیبلەگاهم کەچ بووە
تازە بۆ من زاهیدیش ئوممێدی ئایینی هەیە
ڕوومەتی تۆ باغە ئەمما بۆ دڵی بولبول سیفەت
مەنعە بۆی چونکە لە زوڵفت دەوری پەرژینی هەیە
سەیری چەن شێتە تەبیب ئێستا موداوای من ئەکا
من کە کوشتەی دەستی تۆم ئەو ئارەزووی ژینی هەیە