بە میراتی لە دڵمۆ داغی ڕەش بۆ لالە جێ ماوە
از کتاب:
دیوانی ئەحمەد موختار جاف
اثر:
احمد مختار جاف (1896-1935)
1 دقیقه
598 مشاهده
بە میراتی لە دڵمۆ داغی ڕەش بۆ لالە جێ ماوە
کە وەقتێ سەوز ئەبێ ئەو بۆیە وا ناو جەرگی سووتاوە
بە سۆز و ناڵە دەنگی بولبولێ من دێتە گوێم ئەمشەو
مەزەننە شیوەنی بۆ عاشقێکی تازە کوژراوە
وتی شێتی کە باڵای من ببێ تۆ سەیری عەرعەر کەی
لە جێیێ زوڵفی من بێ بۆ چی تۆ چاوت لە لاولاوە
فیدای ئەو زوڵفە بم وەک سونبولی تەڕ سەر هەتا پێی تۆ
لەدەوری قامەتی سەروت بە پێچ و حەڵقە ئاڵاوە
سبەینێ چوویە باغ و خاڵی ڕووی تۆی دی خەجاڵەت ما
وەنەوشە بۆیە ملکەچ ئێستە وا مەحزوون و داماوە
چلۆن تەیری دڵم ڕزگار ئەبێ جانا لە دەستی تۆ
کە خاڵت دانەیە و حەڵقەی ئەسیری زوڵفی وەک داوە
تەمەننام کرد کە ماچێ تو کەرەم فەرمووی بە بەندەی خۆت
وتی بێ دەنگ بە نابینی ڕەقیب لەولاوە وەستاوە
وتم تا کەی لە حەق من چاوەکەم تۆ بێ وەفا و مەیلی
وتی نازانی ئەحمەدتخلص ئێستەکە بێ مروەتی باوە