دادِ ملەتِ ئیران وە دوکتور موسەدق

از کتاب:
چەپکە گوڵ
اثر:
شامی کرمانشاهی (1917-1984)
 5 دقیقه  1233 مشاهده
وەبەس کە گەردیم دەس و بان دەس
قورب ئەڕام نەمەن چو میوەی ناڕەس
جواو سڵام نیەشنوم لە کەس
بیکار چو ئیمە لە ئیران فرەس
خوەش و حاڵ هەرکەس مریت، ئاس و دەس
دوکتور موسەدق تەکلیفمان چەس؟
نیمی لە ملەت دوچار دەردن
لە سوب تا غوروب بیکار مەگەردن
وە گوسنەیی وینە ی زەعفەران زەردن
مەرد موبارز ڕوز نەبەردن
زەڕ ئەڕای ئیوەو شەڕ ئەڕای ئیمە س؟
دوکتور موسەدق تەکلیفمان چەس؟
نیمی لە ملەت چو گای پەرواری
هەر خوەن و خەفن لە سمن کاری
نە دەرد جوفت خوەن نە دەرد باری
سەرمەستن وە جام بادەی بی عاری
هەمیشە هەفت ڕەنگ و سوفرەشان هەس
دوکتور موسەدق تەکلیفمان چەس؟
ئوشن چلهەزار بیکار و پاتەخت
عومر گرامی مەگوزەرن وە سەخت
بی جا و مەکان بی لباس و ڕەخت
سێ وەعدە غەزا کەردەن وە یەی وەخت
ئاخر ئەوانیش هەم نەوع ئیوەس
دوکتور موسەدق تەکلیفمان چەس؟
یەسە چوار ڕوژ تر هەم زمستانە
زوخاڵ ناب و دە هیزوم گرانە
سدای زیل و بەم بەفرو بارانە
چەقە ی دنان تیەی چو مسگەر خانە
داش نانەوایی نیە کەفیدە دەس
دوکتور موسەدق تەکلیفمان چەس؟
غوسەی کەسادی سفید کرد ڕیشم
لە سوب تا غوروب خەمیازە کیشم
من وە انتزار مشتەری نیشم
بازڕەسەیل هەرسات مەکەن تفتیشم
چە بکەم ئەڕای تەڵەکە ی بازڕەرس
دوکتور موسەدق تەکلیفمان چەس؟
مشتی زەڕ پەرەس سکەی زەڕ شناس
ەیچ دینی نەیرن غەیرەز اسکناس
مە مجلس ڕیا و ڕەوزە قەرارداس
تا نشان بیەن ئەسپاب و ئەساس
یە ڕەوزە نیە، یەیش یەی جور حوقەس
دوکتور موسەدق تەکلیفمان چەس؟
سە ماهە حقوق پاسەبان شار
نیەرەسید نیەدەی دە س تەڵەب کار
مەر جورئەت دیرن بچنە بازار
یە چری ئاغا، ئەو داد کەی سەرکار
دەس مایە نەیریم حەساوکەت بار
وە دینت یە ڕەسم نەقدو نسیەس
دوکتور موسەدق تەکلیفمان چەس؟
ئەوزاع مەملەکەت دەرهەم بەرهەمە
وینەی زولف یارپور پیچ و خەمە
نیمی لە ملەت دوچار غەمە
رشتەی زندگی خەیلی موحکەمە
وەرنە و ئاسان گیان مەدەن و دەس
دوکتور موسەدق تەکلیفمان چەس؟
دەست و پای مەردم پیچاس وە هەم
گش وە کەساتی دوچارن وە غەم
لە هەر کەس پرسم ئوشی چەبکەم
وە گیان شامی هەر لە کیسە خوەم
من ئوشم بخوین تا ئەورەی کە هەس
دوکتور موسەدق تەکلیفمان چەس؟
 
جواو دوکتور موسەدق وە ملەت ئیران
ملەت ئیران! ملەت ئیران!
ئەوەڵ وە یاری حە ی لا مەکان
وە دوعای سەحەر عەلامەی کاشان
وە بەخت و ئیقباڵ خەلق موسوڵمان
خواهەم ئاباد کرد ئیرا ن ویران
خودا یاری کەی وە کار هەر کەس
لە من نەپرسن تەکلیفمان چەس
سەور کەین ئی چەرخە یەی دەور بخوەی دەور
قەوڵ دەم ئی اوزاع نەمینیت وەی تەور
بسازین وە گەرد زەمانەی پور جەور
مەجلس ملی هەردەم هانە شەور
بزانی هەڵوا نەتیجەی ق ورەس
لە من نەپرسن تەکلیفمان چەس
ئومیدوارم ئیران یەی سان بو
نە حاجی نە بەگ نە ئاغا و خان بو
نە یەکی لە بان فەرش کاشان بو
نە یەکی لە ناو کوچە وەیلان بو
هەر کەس کار بکەی کار ئەرای فرەس
لە من نەپرسن تەکلیفمان چەس
ئەر یاد نەیرن دەورەی شەهریوەر
نا ن لوبیا بارینە نەزەر
خورما مەخواردن لە جیای شەکەر
چوار نەفەر شاد بین باقیتان پەکەر
جەمعێ مەواتن ساحەب بیبی هەس
لە من نەپرسن تەکلیفمان چەس
یەقین گومان کەن دوکتور با ڕوسە
یا وە گەرد ملەت، ئمریکا دوسە
بیەودە ژەنن ئی تەپڵ و کوسە
خوا گەواهە دفای ناموسە
هەرگز گوڵ گەچی نیودە ئەتڵەس
لە من نەپرسن تەکلیفمان چەس
یەی تەن پیرەمەرد پاکوسە لیمم
نە موحتاج ماڵ نە زەڕو سیمم
پاکزادو حەق گو بی تەرس و بیمم
ئوستادم وەی تەور کەردەن تەعلیمم
حەق کوشی نیەکەم تا ئاخر نەفەس
لە من نەپرسن تەکلیفمان چەس
نەفت ملی کردم، موڵکیش ملی بو
تاکەی ئی کارە ژیرە جولی بو؟
روزگار وە کام تەوەکولی بو
حەسەن لات موحتاج حاجی قولی بو
ئەر بوشی مردم بوشن وە تەوەس
لە من نەپرسن تەکلیفمان چەس
موسەدق کەی وەت تو شیرەکیش بو
سەر تا پا عوریان لوخت و ئاونیش بو
لە ناو خەرابات نیرە دەرویش بو
سەر گەرم بادەو بەنگ و حەشیش بو
نیمی لە ئیوە چکیدەی شیرەس
لە من نەپرسن تەکلیفمان چەس
ملەت! وە قورعان وە سورەی یاسین
ئیوە سوڵتانن لە لای خەلق چین
روزی چەن هزار لە مەیدان کین
چو بەرگ درەخت ڕزدەی زەمین
توپ چو ئمشی پاش خەلق وینەی مەگەس
لە من نەپرسن تەکلیفمان چەس
ەزار ساڵ مە نو پای غارەتگەر
کوتاە بو لە مەرز ئیرا ن موزتەر
یەسە وە یاری بینای بان سەر
لە ئیران نەیشتم یەی تەن لە کافەر
ئی نام نیکە پەی ئیرانی بەس
لە من نەپرسن تەکلیفمان چەس
ئیران نە ئیران، موسەدق ئاباد
ملەت نە ملەت، غولام ئازاد
لاهە نە لاهە، دیوان عەدڵ و داد
ڕەنج چرچیلشخص کرد وە ڕەنج فەرهاد
سوخەن بەس شامیتخلص ئیتر کوتا کە
لە من نەپرسن تەکلیفمان چەس