شێخ ڕەقیب هەبوو لەو وڵاتی ئاکرێ یە...

شێخ ڕەقیب هەبوو لەو وڵاتی «ئاکرێ» یە، ئەم شێخ ڕەقیبە خواردنی هەر گۆشتی برژاو بوو. خوڵامێکی هەبوو هەر بە دوو ڕۆژ بەرخێکی بۆ سەرئەبڕی و بۆی ئەبرژاند و ئەویش بە پوختی ئەیخوارد. ڕۆژێک شێخ ڕەقیب خەریکی خواردنی گۆشتی برژاوی بەرخی ئەو ڕۆژە ئەبێت لە گەرووی ئەگیرێ و هەرچەند ئەکا ناچێتە خوارەوە. خوڵامەکەی بانگ ئەکا و دەس ئەکا بە جنێودان و پێی ئەڵێ تۆ ئیمڕۆ گۆشتەکەت باش نەبرژاندووە، ئەوەتە ئەگیرێتە گەرووم. ئەویش هەر چەند ئەڵێ یاشێخ باشم برژاندووە هیچ ناتەواویەکی نییە کەڵکێ ناگرێ، شێخ هەر جنێوی ئەداتێ و بە دەمیشیەوە لە حەیبەتانا ئەکۆکێ. ئەمجا خوڵامەکە ئەڵێ: «بەخوا یاشێخ زۆر چاکم برژاندووە، بەڵام ئەوەندە هەیە ئەم بەرخە- کە من ئیمڕۆ سەرم بڕی- ماڵی حەڵاڵ و بێ غەشی خۆت بوو».