جۆیباری چاوەکانم ڕووی زەمینی گرتووە
از کتاب:
دیوانی سافی هیرانی
اثر:
صافی هیرانی (1873-1942)
1 دقیقه
1886 مشاهده
جۆیباری چاوەکانم ڕووی زەمینی گرتووە
بۆیە سەحرای سینەکەم سەبزەی غەمی شین کردووە
ئەی ڕەفیقان مەنعی ناڵینم مەکەن بێئیختیار
حاڵەتێکە موبتەلایە دڵ لەدەستم دەرچووە
ناسیحا وەعزی سەبووری دامەدە بێ فایدەیە
من لە مەکتبخانەیی غەم دەرسی عەشقم خوێندووە
خۆت ئەگەر بێی بمکوژی خۆشە لەلام ئەمما ڕەقیب
وا دەڵێ مەحبووبە قەتلی تۆی بە گوێی من کردووە
هیچ کەسێ نایێ بە هاوارم لەلای ئەو عالەمە
وا لەبەر ناڵە و فوغانی من قیامەت ڕابووە
دەفعەیێ بۆ سەر نەخۆشانت ئەگەر بێی ئەی تەبیب
دەردەدارانت لەخۆشی تۆ شیفایان هاتووە
عومرەکەم سەرفی وەفات بوو مەرحەبایێکم نەدی
وا دەزانم ڕووحەکەم مەیلت لەسەر من لاچووە
دوور لە باڵای تۆ بیناییم کوێرە هەڵنایێ بە کەس
ڕۆژ و شەو بێدارە چاوم، وا مەزانە نوستووە
حاڵی «سافی» گەر دەپرسی وا لە دەس هیجرانی تۆ
مات و مەبهووتە لە گۆشەی بێکەسی دانیشتووە