پێنج خشتەکیی سافی لەسەر غەزەلێکی ناری و تاهیربەگ
از کتاب:
دیوانی سافی هیرانی
اثر:
صافی هیرانی (1873-1942)
2 دقیقه
2594 مشاهده
من و دڵ ئەمڕۆ ئەو شۆخە لە خۆشی یەک بە دەی کردین
لە جامی لەعلی سەرخۆش و موقیمی مەیکەدەی کردین
هەتا مەحشەر خومار و مەستی ناز و نەشئەکەی کردین
بە غەمزەی چاوی مەخمووری سیاهی مەستی مەی کردین
بە ماچی لێوی موستەغنی لە ئەنواعی مەزەی کردین
بە ئەو یارە بڵێن یاران چییە سووچ و گوناهی من
نەسیم ئەنگووت و شەو ڕۆیی چەمەن واڵا بوو ماهی من
چ قەوماوە مەگەر قوربان کە وا بەستووتە ڕاهی من
ترازا بەندی سوخمەی ئاڵی گوڵناری بە ئاهی من
کەچی دەستی لەسەر دانا لە سەیری باغی بەی کردین
لەبۆ یەک مەرحەبایێ چوومە لای یارم بە سەرخۆشی
نیقابی خستە ڕوخسار و بەجارێ کەوتە خامۆشی
کە وام دی ڕۆیی ئارامی دڵ و سەبر و فەرامۆشی
بە هەوری پەرچەم و زوڵفی ڕوخ و ئەبرۆی کە داپۆشی
لە شەوقی ڕوئیەتی بەدری هیلالی یەکشەوەی کردین
ڕەفیقانم کەسێ عاشق نەبێ لەم سیڕڕە نازانی
لە لایێ یار حەیاتبەخش و لە لایێ قابزی جانی
لە هەر دوو لاوە تەسلیمم بڵێن دەستم بە دامانی
ئەگەرچی کوشتمی خۆ قابیزولئەڕواحی موژگانی
بە قانوونی مەسیحایی بە خەندەی لێوی حەی کردین
لەبۆ خوێنڕێژی عوشاقان نیگارم گەرچی بێباکە
وەلێ ئەی دڵ لە ڕووی ئوممێدەوە جارێ تەماشا کە
مەڵێ سافیتخلص زەمان ئاخر بوو کەس ئیمدادی کەس ناکا
دەوایی دەردی دڵ «ناری» لە «تاهیربەگ» تەمەننا کە
بڵێ ئەمڕۆ گوڵئەندامێ بە تیرێ جەرگی پەی کردین