خۆفرۆش

از کتاب:
گوناهـ
اثر:
علی حسنیانی (1939-1992)
 1 دقیقه  1105 مشاهده
هەر کاتە جێیەک،
هەردەم لە شوێنێک،
هەر شەو بە مەستی،
میوانی نوێنێک...
 
بێکەس و تەنیا
دیلی داوی خەم،
ڕۆژگاری شەوگار
ئۆگری ماتەم
 
بەرەو نەهاتی
دەچێتە پێشێ
تاوانبار نیە
تاوان دەکێشێ
 
تریفەی مانگە
لە نێو کەلاوان
شەمامەی جوانە
بۆ دەستی لاوان
 
جامی ژیانە
بەڵام شکاوە
تازە یەک بگرێ؟
خەیاڵی خاوە...
 
ڕۆژێ دەیبینی
گوڵێک پەڕپەڕ بوو
یەک بە یەک دەڵێ:
- ئەویش لە دەس چوو