گول شەنگێ
از کتاب:
شەفاق
اثر:
جگرخون (1903-1984)
2 دقیقه
937 مشاهده
بەژن شۆخێ، گولی شەنگێ، ل سەر شەنگێ دکن جەنگێ
سپی زەندێ، وەکی پەنگێ، دران زێر و برنجینە
ب لێڤ و دەڤ کەلاجۆیە، کەڤان ئەبروو پەری رۆیە
شرین گۆتن، پلنگ خۆیە، مەمک سێڤ و ترنجینە
چ جادوونە دو چاڤێن رەش؟ چ رەنگ رۆنە دو دێمێن گەش؟
دەما کۆ تێ ب لەنج و مەش، بروو رەشخوار و زەنجینە
سەرێن تلیێن پیان سۆرە، د لنگاندە نەهن گۆرە
ب رست گۆتن، ب کەن تۆرە، ژ زێر گەردەن چ گەنجینە؟
هەمی زێر و بەلەخشانن، ب رستن ئەو، زەرەفشانن
وەکی نەقشێ دەرەڤشانن، ژ هندێ تێن، فرنجینە
دور و زەنجیر و پشکۆژن، ژ وان سەد وەک مە دلسۆژن
دیسن تەڤ وەکی رۆژن، ب ئێش و دەرد و رەنجینە
سپی دێمن ب خالن تم، دو لێڤێن سۆر پەیالن تم
ژ بەر وان ئەم دنالن تم، ب ساون ئەو، چ گورجینە؟
دەما من دیت ژ برجێ تێ، چرین و رند و گورجێ تێ
وەکی لالێ د دورجێ تێ، ب لار و ناز و لەنجینە
شەکەر لێڤێ گها با من، شرین و ناز و رندا من
ژ لێڤان شەربەتەک دا من، دەڤ و لێڤ سۆرە، خونجینە
ژ بەر وێ شەربەتا جامێ، ژ شەوقا وێ قەد و قامێ
ڤەدا دل شەوق و ئلهامێ، ژ وان زولفێن د مەنجینە
ل سەر ئەنیێ زولف چینچین، ل من جان و جەگەر کر خوین
ب چاڤان دایە من مزگین، مەترسە! ئەڤ ژ قەنجینە