قیبلەم دڵەی سەخت
از کتاب:
دیوانی بێسارانی
اثر:
بیسارانی (1643-1702)
1 دقیقه
541 مشاهده
قیبلەم دڵەی سەخت ...
یاوا وە گەردوون ناڵەی دڵەی سەخت
دوودی دەروونم سیا کەردەن سەخت
جە قەڵوەزی هوون گڵکون بیەن ڕەخت
فیراقی حەسرەت جە نەو خێزاوە
دیدەی نابینام ئەسرین ڕێزاوە
شەوقم تەوقی خەم شی نەگەردەنش
لادێ نین قیبلەم شادی کەردەنش
چەپ گەردی گەردوون، بەدبەخت، بێ ئامان
من وست ئەو تۆڕ دام نە ڕای بێ سامان
پەی دیدەن دیدەت لەیلی ڕوو بێ گەرد
من دەستەپاچە و دڵ هەناسەسەرد
نە سەور، نە ئارام، جە بەدیی تاڵەم
هەراسان بیەن ئاڵەم جە ناڵەم
دەستم دامانت سەوڵی خەرامان
بکیانە مەڵهەم پەی شەفای زامان
بەڵکەم ئەمجاریچ گەردەن جە گەرد پاک
نەدیەنی باڵات نەبەروون بە خاک