گوڵێکم بوو لە دونیادا شکۆفەی باغی ڕەعنایی
از کتاب:
دیوانی وەفایی
اثر:
وفایی (1844-1902)
2 دقیقه
9329 مشاهده
گوڵێکم بوو لە دونیادا شکۆفەی باغی ڕەعنایی
لە داغی پەرچەمی شێوام لەنێو بازاڕی ڕیسوایی
وەکوو بولبول بە ڕووح و دڵ شەو و ڕۆژ بوومە سەودایی
هەموو عومری عەزیزم چوو لە ڕێی خەندێک بەخۆڕایی
بەجارێ ماڵی وێرانم ئەمیشم چوو ئەویشم چوو!
ئەمن وەک پەرچەمی جانان، ئەمن وەک نەرگسی یارم
لە لایێ خاو و سەرگەردان، لە لای مەست و بیمارم
بڵا بگریم بناڵێنم، کە وا تێک چوو سەر و کارم
دڵم دانا لە ڕێی دڵبەر: نە دڵبەر بوو نە دڵدارم
بە جارێ ماڵی وێرانم ئەمیشم چوو ئەویشم چوو!
گوڵێکم بوو لە باغی دولبەریدا ماهی کەنعانی
دڵێکم بوو لە ڕیزەی عاشقان مەجنوون بە سووتانی
دڵی بردم، فریوی دام بە ماچی لێوی مەرجانی
ئەسیری ئیلتفاتی سەر زبانی بووم و نەمزانی
بە جارێ ماڵی وێرانم ئەمیشم چوو ئەویشم چوو!
بە ئاوی چاو و خوێنی دڵ، بە سەعیی ڕووحی شیرینم
غەزاڵێکم لە داو خست ئافەتی دڵ غارەتی دینم
هەتا چووم چاوەکانی ماچ بکەم لەحزێکی بیبینم
لە دەستم چوو وەکوو دڵ، بوو بە مایەی شیوەن و شینم
بەجارێ ماڵی وێرانم ئەمیشم چوو ئەویشم چوو!
وەفاییتخلص من شەهێنی قۆڵی چاوبازانی شاهان بووم
ئەسیری دەستی گوڵدەم، سەروباڵا، ماهڕوویان بووم
گەهێ بولبول، گەهێ تووتی، گەهێ مورغی غەزەلخوان بووم
بە ئوممێدی عەزیزێک –دوور لە چاوم- پیری کەنعان بووم
بەجارێ ماڵی وێرانم ئەمیشم چوو ئەویشم چوو!
خوداوەندا! خوداوەندا! پەشیمانم پەشیمانم
بە کاری ئاخیرەت نایەم عەجەب ئالوودە دامانم
بە باری مەعسییەت شەرمەندەم و چاو پڕ لە گریانم
نە دینم بوو نە دونیا گەر نەکێشی خەت بە دیوانم
بەجارێ ماڵی وێرانم ئەمیشم چوو ئەویشم چوو!