نەورۆز بەخێربێی جەژنی نەوبەهار
از کتاب:
دیوانی مەزڵووم
اثر:
مظلوم (1916-1955)
1 دقیقه
374 مشاهده
نەورۆز بەخێربێی جەژنی نەوبەهار
دنیات نەجات دا لە سەرما یەکجار
سوپای عەدلی تۆ گەیشتە لامان
نوقمین لە گوڵدا سەرتا بەدامان
بە هەوات لە جێی گەرمیان و کوێستان
گوڵ خێمەی هەڵدا بەیداغی چەقان
درەختی دەشت و چیاو لاپاڵان
کردیان بە بەردا کەوای سەوزو جوان
دەستەی گوڵی جوان، پەسەندی نازدار
خۆی ئاریشدا لە کانی و کۆسار
نێرگسی ڕووخۆش وەک جوانی سەر مەس
خۆی کرد بە ساقی و پیاڵەی زەڕ بەدەس
کەنێرە بۆنی خۆشی حازر کرد
بە بۆنی خۆشی جیهانی پڕ کرد
لە وشکە چەمان ئاوان جاری بوون
ئاوەڵ و چەمەن گشت سەوزو شین بوون
هاژەی قەڵبەزان شمشاڵی لێدا
بای وەعدەی بەهار لە هەڵپەڕکێدا
مەلانی عاشق لە گوڵزاری شین
بەستە ئەخوێنن بە لەهجە شیرین
گڕ وەک ئاگری زەردەشت هەڵگیرسا
مەزڵوومتخلص لە مەدحت دەنگیشی نووسا