عیلاجی دەردی ئیشقی خونچەی لێوی شەککەرباری
از کتاب:
دیوانی تاهیر بەگی جاف
اثر:
طاهر بیگ جاف (1878-1918)
1 دقیقه
2672 مشاهده
عیلاجی دەردی ئیشقی خونچەی لێوی شەککەرباری
گوڵ و شەککەر دەبارێنێ بە حەققەت نوتقی گوفتاری
فەلەک زانی کە دەشکێ ڕەونەقی بازاڕی مانگ و خۆر
شکاندی پەنجەکەم تا من نەنووسم وەسفی ڕوخساری
بە غەمزەی نیم نیگاهی سەد دڵی بێچارە مەحبووسە
لە بابل خوێندوویە ئەفسوون دوو چاوی بیچووە عەییاری
بە شوعلەی شەمعی ڕوخساری دەسووتێ دڵ وەکوو قەقنەس
وتم پەروانەیە، یاڕەب نییە وا بانگ و هاواری
وەکوو یوسف ئەگەرچی موشتەری وەستاوە سەف دەر سەف
وەکوو تاهیرتخلص نییە ئەمڕۆ بە جان و دڵ خەریداری