بەیەکەوەبەستن (العطف)

بۆ بەستنی دوو وشەی کوردی بە یەکەوە دوو ڕێگە هەیە: ١- ئەگەر تیپی وشەی «پێوە بەستراو» بەدەنگ بوو لە حاڵەتی «پێوەبەستنا» تیپی «w» دائەنرێ لە بەین «پێوەبەستراو» و «بەستراو»دا. وەک:

• «کتێبەکە و دەفتەرەکە / kitêbeke w deftereke»،
• «سوارە و پیادە / suware w pîyade»،
• «چا و ماستاو / ça w mastaw»،
• «ئازا و ترسنۆک / aza w tirsinok»،
• «پێ و دەست / pê w dest»،
• «سێ و چوار / sê w çuwar»،
• «چوو و هاتەوە / çû w hatewe»،
• «توو و مێوژ / tû w mêwij»،
• «لاتی و پەرێشانی / latî w perêşanî»،
• «ئازادی و سەربەستی / azadî w serbestî»،
• «سەکۆ و قەنەفە / seko w qenefe»،
• «چەکۆ و حەیفۆ / çeko w ḧeyfo».

سەرنج: لەبەر ئەوەی هیچ وشەیەکی کوردیم شک نەبرد کە دوا تیپی بە «i» یان «u» تەواو ببێ، دیارە بۆیە وێنەمان پیشان نەدا بۆیان. خۆ ئەگەر هات و بوو، یان لە زمانێکی بێگانەوە وشەیەکی وا هاتە کوردییەوە ئەوا وەک ئەوانەی سەرەوە ئەنووسرێ واتا «w» ئەخرێتە بەینی «پێوە بەستراو» و «بەستراو»ەوە. ٢- ئەگەر دوا تیپی وشەی «پێوە بەستراو» بێدەنگ بوو لە کاتی «بەستنا» تیپی «û» دائەنرێ لە بەینی «پێوە بەستراو» و «بەستراو»دا، وەک:

• «کتێب و دەفتەر / kitêb û defter»،
• «هاوار و بانگ / hawar û bang»،
• «کەف و کوڵ / kef û kul̈»،
• «تێر و تەسەل / têr û tesel»،
• «تار و پۆ / tar û po»،
• «بەژن و باڵا / bejin û bal̈a»،
• «من و تۆ / min û to»،