ئیزافەکردن (إضافة)

ئیزافەکردنی وشەیەک بۆ وشەیەکی تر لە کوردیدا بە چەند چەشنێک ئەبێ: ١- ئەگەر دوا تیپی وشەی موزاف (مضاف) بەدەنگ بوو لە کاتی ئیزافەکردنا تیپی «y» دائەنێیت لە بەینی «مضاف» و «مضاف الیه»دا یان تیپی «y»یەکە بە جارێ ئەنووسێنیت بە «مضاف»ەوە. وەک:

• «چای سەیلان / çay seylan»،
• «ڕۆژنامەی ژین / rojnamey jîn»،
• «پێی زل / pêy zil»،
• «ئازادیی زمان / azadîy ziman»،
• «هۆی ئەمە نازانم / hoy eme nazanim»،
• «ڕووی سپی بێ / rûy sipî bê»

سەرنج: هیچ وشەیەکی وام نەدۆزیەوە کە تیپی دوایی «i» یان «u» بێ، بۆیە نموونەم بۆ نەهێنایەوە ئەگەر شایەت هەبوو وەک ئەوانەی سەرەوە ئەنووسرێ. ٢- ئەگەر تیپی دوایی وشەی «مضاف» بێدەنگ بوو لە کاتی ئیزافەکردنا تیپی «î» دائەنرێ لە بەینی «مضاف» و «مضاف الیه»دا یان «î»یەکە هەر ئەنووسێنرێ بە «مضاف»ەوە. وەک:

• «کتێبی قوتابیەکە / kitêbî qutabîyeke»،
• «کۆڤاری هەتاو / kovarî hetaw»،
• «شیرینی هەنگوین / şîrînî henguwîn»،
• «سەرنجی ئێوە / serincî êwe»،
• «تەپڵی گوێ / tepil̈î guwê»

٣- لە شێوەی باکوورا تیپی «a» بۆ ئیزافەکردنە لە کاتێکا «مضاف» مێ بێ؛ «ê» بۆ ئیزافەکردنە لە کاتێکا «مضاف» نێر بێ. وەک:

• «ماینا من / mayina min» واتا ماینی من،
• «خوشکا تە / xuşka te» واتا خوشکی تۆ،
• «برایێ من / brayê min» واتا برای من،
• «کتێبێ تە / kitêbê te» کتێبی تۆ.

٤- لە شێوەی سنە و کرماشانا هەندێ جار «i» بۆ ئیزافە دائەنرێ. وەک:

• «بە بان چاو / be bani çaw»،
• «کەیف خۆتە / keyifi xote»