ناونیشانی کوردان
از کتاب:
دیوانی ڕاجی
اثر:
راجی (1912-1969)
15 دقیقه
204 مشاهده
١
هانام بە بەر تۆ یا غەففار
سوڵتانی شاخ و دەشت و شار
دامەزرێنی لەیل و نەهار
ڕزقی دەدەی بە موور و مار
هاوین، زستان، پایز، بەهار
چەرخت گێڕاوە پایەدار
بەخێو دەکەی گەدا و توجاڕ
بزر ناکەی یەک تۆزە کار
لە هەموو حاڵێ ئاگەدار.
٢
ئاگاداری هەموو حاڵان
هی دەردەدار و چاو کاڵان
لەناو شاخان، لەناو ماڵان
ڕەحمێ دەکەی بە عەوداڵان
دایانپۆشن بە دەسماڵان
چ هۆدە و ناز، چ بن داڵان
بە ماچان بپرسن حاڵان.
٣
بپرسن حاڵی فەقیران
دەریانبێنن لە زنجیران
بارانیان مەکەن بە تیران
هەروەک دیلان و نەچیران
لەلای خەزێم و لاگیران
بۆ منی هەژار و ماڵ وێران
جێگای ماچمکە، دەسگیران
لەناو ڕەزان، لەسەر بیران
هیچ مەترسێ لەبی پیران.
٤
لەبی پیران، نەتبێ باکە
نازەنینەی ڕوومەت پاکە
هی چاومەستەی پڕ تریاکە
گەردن بللووری ئەفلاکە
بەو خودایەی تەنیا و تاکە
ڕۆحم دەڵێی لە ژێر خاکە
بەدەن دەڵێ: لێم حاشا کە
لە داخی تۆ، جەرگم چاکە.
٥
جەرگم سووتاوی کوڵمانە
لەبن ڕیزەی ئەگریجانە
شنگ و هەڵاڵ و ڕەیحانە
دەستە دەستەی کاکۆڵانە
گیابەند و خاوی شاخانە
میسک و عەنبەر چەند هەرزانە
غالییەی عەتری شارانە
نموونەی زوڵفی یارانە
دەڵێی ڕیزەی باڕێزانە
لە دەم شەکراوی چاوانە
داغی سەر جەرگی باغانە
بڕوانن ئاخر زەمانە!.
٦
ئاخر زەمانم لە چاوە
شەرم و حەیام هەڵگیراوە
پیاڵەی شەرابی داناوە
نێرگس لە دەوری ڕسکاوە
مەزەی خاڵ و خەت کشاوە
هێشتا دەستی لێ نەدراوە
جووتێ بادەی لێ نەخشاوە
ساقی بۆم بێنە بەم لاوە
ئەجەل نێزیکە، وەستاوە
شیری برۆی دەرکێشاوە
جەوهەردارە، تازە ساوە
تیری برژانگی داناوە
خێرابە، کارم تەواوە.
٧
کارم تەواو لە کەوانی
دڵی کردوومە نیشانی
لەبەر شوعلەی دوو کوڵمانی
وەک مانگ و ڕۆژی تابانی
بزرم ناکا لە چاوانی
بە پڕشنگ و بڵێسانی
بە مونجان و درەوشانی
بێ فەرقن شەو و بەیانی
بەخوا خۆشە ڕاموسانی
سبەینان و، ئێوارانی
نیوە شەو و، نیوڕۆیانی
پاش عەسران و، بەیانیانی
چێشتەنگاو و، ماڵ نووستنانی
شەکر و شیر و خەمرەکانی
هەنگوینی بێ هاوقەرانی
بەرەو خوار بێی، بۆ لێوانی.
٨
لێوی چی؟ ئاوی حەیاتن
زێڕی سووری بێ زەکاتن
یاقووت ڕێژن، بۆ وەڵاتن
شیفای سەد نوقڵ و نەباتن
چەند پاشای بەرزی بۆ هاتن
چی فەوتان و، چی هەڵاتن
هێندێ بە هیوای خەڵاتن
وەکو من بێ دەستەڵاتن
بەڵام بە سەبر و سوباتن
دایم لە سەودا و مەزاتن.
٩
سەودا و مەزاتی لێوانە
موشتەری ڕیزەی ددانە
دوڕڕ و گەوهەر بە بارانە
مامڵەتگرم ماڵوێرانە
سەودای بە خوێنی چاوانە
هێشتا دەڵێ چەند هەرزانە.
١٠
هەرزانە کویی زەقەنێ
داڕژاوە بە سەد فەنێ
قەت دەرنایە لە مەفتەنێ
لەسەر قەڵاتی گەردەنێ
قوببەی سەد ڕەنگی مەعدەنێ
قوربانی بم، پێدەکەنێ
ڕۆحی عالەم هەڵدەقەنێ
مووسا ڕۆیی بۆ مەسکەنێ
لە شێوەی غەبغەبی تەنێ
پێڵاوی پێ دادەکەنێ.
١١
نەعلی چی؟ ئێرە تەووایە
جێگای ناسینی خودایە
گەردەن، داری داگیرسایە
شەویش، تاریک و سەرمایە
هەور و باران، ڕەعد و بایە
دەستەچیلێکی بۆ نایە
سەر لێ شێوانی مووسایە
بیزانن کاری مەولایە
هاروونیش هاتە هانایە
تەسخیری فیرعەونی شایە
بە کەوکەبە و تەماشایە
با غەرقی کەن لەم داوایە
نۆرەی موعجیزەی عیسایە.
١٢
موعجیزەی عیسا لە سینە
سفرەی خودای بێ قەرینە
ناردی بۆ قەومی بێ دینە
ئیمان بێنن بە یەقینە.
١٣
سفرەی شیرین، سینگ و مەمە
چارەی هەزار دەرد و غەمە
بللووری ساف و بێ تەمە
بە فنجان و، بە زەمزەمە
دەڵێی دایەرەی عالەمە
خڕ و پڕ و شەکرلەمە
ساڕێژی گشت دەرد و غەمە
هەریەک خونچێکی بە دەمە
بەشی هەزار هەزار جەمە
ئیمان بێنە بە دڵ و دەمە
نەوەک بتکاتە شەمشەمە
ئەی خۆشەویستەی هەمدەمە.
١٤
ئەی هەمدەمەی کار و باران
ئاشقی باڵای چاو بەخوماران
دڵ بەلەرزەی گوارەداران
لێقەوماوی گوێ بە گواران
بڕوانە چۆچەی هاواران
لەسەر لاجانگی نازداران
سەرنشێو دێن، هەروەک جاران.
١٥
هەروەک جاران، نەرم و شلە
لە ڕێی کەزیەی، چاوم کولە
ماری ڕەشی شان و ملە
هانا دەبا، بە بولبولە
گەردن لغیش لەسەر پڵە
دەڵێی ماڕووتی بابلە
هەڵاوەسراوی کاکوڵە
کرمۆکەی دێنە بەر دڵە
ئەمجا نۆرەی قەنەفڵە
جانتای عەییاریی لە ملە.
١٦
لە مل، جانتای عەییارییە
مێخەکبەندی دڵدارییە
پەروەردەی بێنی بارییە
بە زنجیرەی نازدارییە
سەودای لادێیی و شارییە
بە پیرۆزە و مروارییە
هەوای لە ڕووی سەردارییە
لەسەر سینەی بەهارییە
سەد گوڵ خونچە بەزارییە
نێرگس بەشی غەمخوارییە
چاوی زەرد بوو، یەکجارییە
ڕەنگی سپی سەربارییە
قوڕ بەسەر من، ڕێم هارییە.
١٧
ڕێم هارییە، وانەم دوورن
سوور و سپی، ڕەنگ بلوورن
سەوز و ئاڵ و، زەرد و سوورن
هەژانی بەنک و بەن موورن
دوگمە و هەیاسەی پڕ نوورن
کەمبەرە و لوولەی مەسروورن
سەرگەرم و مەست و مەخموورن
لەشکری بێ باسک و بوورن
لێیان دوورە هەرچی زوورن.
١٨
هەرچی زوورە، لێیان نایە
مێرگیان بە ئاوو هەوایە
هەریەک لە داوایەک دایە
بێ نەزیرم لەم دونیایە
ورشە ورشم لە پەنایە
چ لەم لابێ، چ لەو لایە
بەهەشتم جێگە و مەئوایە.
١٩
جێگەم لە باغی بەهەشتە
قاشی ناوکی چەندە خشتە
شووشەی زگی ساف و دەشتە
نەخشاوی خاڵ، حەوت و هەشتە
تورت و تەڕ و لووس و گشتە
وا دەبێ حۆری سروشتە
پیرۆزیان بێت ئەم فریشتە
بەناو ئێکە، هەزار چشتە
یەک تەختەیە، خشت و مشتە
هەر کاری وەستای بێ پشتە.
٢٠
کاری وەستای بە حەواوە
هەر بە ئەمرێک داڕژاوە
قوببێکی وای لێ هەڵداوە
ناوی سەد گەنجی لێناوە
ئەم ئینسانەی وا بەر چاوە
هەی کاکە لێرە ڕسکاوە.
٢١
هەی کاکە جێی جوستوجۆیە
لە دامێنی گەردن، گۆیە
مابەینی ناوک و ئەژنۆیە
تەوقێکی وام لە ئەستۆیە
لێرە ناکەم گفتوگۆیە
عەیبی ئێمەش هەر هی تۆیە
مەڵێن شایەرمان شەتحۆیە
ئەگەر بیڵێم باوکە ڕۆیە
جەرگم سووتاوە، بۆنسۆیە.
٢٢
جەرگم سووتا وەک قەقنەسی
لەتاو ئەستوندەی ئەتڵەسی
هەردەم دەدرەوشێ نەرگسی
قەت شین نابێ خار و خەسی
دڵمی بەناز هەڵاوەسی
بە قەد و سەروی نەوڕەسی
حەپسە تا ئاخر نەفەسی
چەندە ناخۆشە بێکەسی
خوایە هەر تۆم فریاڕەسی.
٢٣
فریاڕەسم هەر تۆی خودا
پووز و بەلەک بە دەردەخا
مۆمی بلەوری هەڵدەکا
دونیایە پڕ ئاگر دەکا
سەد ئەولیا کافر دەکا
پاشا و گەدا، شێخ و مەلا
دەبن بێهۆش و بێ سەدا
فکر ناکەن چ حەشتەبا
غەیری دوو قالب کارەبا
لە ئەژنۆی تاکو نووکی پا
لە چاوان دەکا مەرحەبا.
٢٤
مەرحەبای گەورە و منداڵە
هاڕەی پاوانە و خڕخاڵە
لە پێی کچی چواردە ساڵە
لە پا وو پووزی عەوداڵە
تێی هاڵاوە ماڵە و ماڵە
دەڵێی ماری بێ ئاواڵە
لە گەنجی زیو و ساماڵە.
٢٥
ساماڵ و شەوقی لەنجەیە
ئەمجا نۆرەی سەر پەنجەیە
ئەویش لەدەم ئەو گەنجەیە
دەڵێی لە جێی پەنج فەرزەیە
ڕووی لە مەککە و مەدینەیە
هەر یەک فانۆسی دیدەیە
خێری وانم، یەک بە دەیە
هەر ساتێ، سەد خێری هەیە.
٢٦
خێری پەنجەی کافوورینن
لە خوانەناسان پڕژێنن
هێند ناسک و نەرم و شیرینن
کاژی مەڕمەڕ، بلوورینن
بەتا وو بۆن، داری چینن
تەرز و تەڕ و، هین و مینن
وا ڕەنگاوڕەنگ و نەخشینن
ژیانی ڕووی سەر زەمینن
خۆ کوێر نەبوون، بۆ نایبینن؟.
٢٧
بۆ نایبنی پشتی قاچی؟
لەسەر کوورەی غەمان لاچی
گەر بیگەیە، بیکەی ماچی
تێی نافکری، دایدەپاچی.
٢٨
دایدەپاچی هەروەک شەکر
وەک نەخۆشێ، بۆی بێ بەفر
یاخوا، یا حەزرەتی خدر
جەرگم بۆی بوو پندر پندر
بۆ شەکر و بەفری وا نادر.
٢٩
نادرن، ئەی برای ڕێیە
ئەمجا، نۆرەی بەری پێیە
دەڵێی ئاوێنەی ئاوێیە
کەیفت، کاکە، لە هەر جێیە
تەماشایکە و، چاوت لێیە.
٣٠
چاوت لێیە لە قومپانی
تۆپی زێڕین، یاری گیانی
شەڕی ئینگلیز و ئەڵمانی
هەراکەی چین و ژاپانی
بە ئیتالیا و، ئەمریکانی
بە ڕووس و میسر و یۆنانی
لەسەر وییە گەر دەیزانی
هەروەک بەیتی بەردەشانی
لە قەرانگوێ و، قۆمەرغانی
بە تاسە و، لوولی زوڵفانی
مەدحی دەکا، تا قومپانی.
٣١
مەدحیان کرد تا قووپانەوە
هەموو چوون و بڕانەوە
شایەر بە چەند لێکدانەوە
یار لەبەر دەستیان مانەوە
منیش ماندووم حەسانەوە
هێندێکم نایە بانەوە
دەست و دەمم کشانەوە
کە تێفکریم بە گیانەوە
عەیبی نییە بادانەوە.
٣٢
بادانەوەم، بۆ بازووە
شەهێنی سەد تەرازووە
خودا دروستی کردووە
لە سەد ماددەی بژاردووە
بۆ دەستەملانی ناردووە
دوو چلچرای هەڵکردووە
لە باڵای یاری بەستووە.
٣٣
باڵا و ئاڵا دەستا و دەستە
قۆڵ و باسک، دەستە و ڕەستە
کاژی زیوین، شیری خەستە
هەرکەس جێگای بەرز و پەستە
جەرگی سەقەت، ڕۆحی سستە
سەربەخۆ، شێت و سەرمەستە
ئینجا دڵبەر چ دەربەستە؟.
٣٤
چ دەربەستە یاری مەزن؟
لەبەر هاژە و هاڕەی بازن
پاشا و گەدا بۆی دەتەزن
لێو و سمێڵان دەگەزن
بە مەقسەد ناگەن، دەبەزن.
٣٥
ناگەن بە پەنجەی گەوهەری
بە قەنتار بێنن مشتەری
بەردی بە قیمەت جەوهەری
قەتارەی شەمەندەفەری
لە دو ویش باری حوشتری
نینۆکی ناداتە بەری
ئەو نەونەمامەی دڵبەری
حەسوودی پێ دەبەن پەری
لە پێوە تا تۆقی سەری
ڕۆحم بە جارێ هەڵوەری
وەختە لە خۆم ببم بەری
بە بێکەسی و، بە بێ دەری
بە فەقیری و قەلەندەری
هاتم کە ببمە هاوسەری
مردم بە سەد کوێرەوەری.
٣٦
مردم لە داخی ڕوومەتی
گەڕام، سووڕام مەملەکەتی
بە پێ خواسی، بەسەر پەتی
بە هەزار جۆرە ئافەتی
هەرچی هەمبوو لە دەوڵەتی
دامنا لە بان خاڵ و خەتی
ڕووت و قووت بووم ئاقیبەتی
دەیبەمە قەبرم، عەزرەتی.
٣٧
عەزرەتم هەر ئاخ و داخە
چۆڵم کردن کاخ و لاخە
جارێکم گوت: جێم بۆ ڕاخە
وتی: هەی هەی، چەند گوستاخە.
٣٨
چەند گوستاخە وەک پەروانە
کاری پەروانە سووتانە
لە ئەلەتریکی کوڵمانە
بڵێسەی نووری یەزدانە
چەرخی هەزار شەبوستانە.
٣٩
چەرخی لەنجەی لە باڵایە
زەرد و سوور، ئاڵ و واڵایە
شەدەی بە ناز لەسەر نایە
دڵی خەڵکی لێ پێچایە
هەر یەک سەد گرێی لێدایە
چارۆکەی بەسەر کێشایە
دەڵێی گەنجە داپۆشرایە.
٤٠
دەڵێی گەنجی بێ قیاسە
شاهید، توڕڕەی پێچ و تاسە
جێگەی هەرا و باس و خواسە
ڕیشوەی بە ڕیز ئاس و لاسە
هەر یەک مەستی تاس و کاسە
بە گێلاس و، بە ڕێواسە
چۆن ناکەوێتە وەسواسە؟
ئەوەی وەلی و خوداناسە.
٤١
ئەوەی دەسوڵحا بۆ خودا
لە مزگەوت و لە خەڵوەدا
کە دی دڵبەر لە جیلوەدا
بەجارێ وا هەڵخەڵەتا
گاور بوو، لە دین وەرگەڕا
شەیتان حەسوودی پێ دەبا.
٤٢
حەسوودی پاشاو خونکارن
بە ئاخ و داخ و هەژارن
شێخ و دەروێش خزمەتکارن
پاکیان بەهێش و ئازارن
چاوەڕێی ئەمری دڵدارن
سەرمەست و شێت و بیمارن
لە گیانی خۆیان بێزارن.
٤٣
بێزارە هەرچی دیندارە
هەردەم لە هاتوهاوارە
بە هەزار دڵ بریندارە
ئەشقی دوو چاوی نازدارە
هەرچی پیرە، هەرزەکارە
گەر زارۆی پار و پێرارە
وەکو من زار و نەزارە.
٤٤
زار و نەزار وەکوو منە
نقووم لە گۆمی بێ بنە
چونکو چاوی لە گەردنە
ماڵوێرانی بەڵگ و بنە
پشکنیم کون و قوژبنە
دیتم هەرچی کچ و ژنە
نەمدی وەکو ئەو گوڵبونە
ئەتۆش بڕۆ، بیپشکنە.
٤٥
بیپشکنە هەرچی باشە
چی خاوەن ڕوتبە و مەعاشە
بە قەشە و، ڕایب و، شەمماشە
بە دۆمی وەستای کەڵاشە
وەستای بێژینگ و تەڵاشە
هەرچی گرد و، هەرچی شاشە
بە باربێنن زێڕ و داشە
چ ئاوریشمە و، چ قوماشە
هێشتا بەهای یار، بەلاشە.
٤٦
بەهای قەت نایەتە ڕایە
نۆرەی سەیران و سەفایە
لە شار و دەشت و سەحرایە
بە کۆمەڵ دێن بۆ سەمایە
ناسکە کیژن، ڕۆڵەی دایە
کارئاسکی ئایە و مایە
هەمووی شیرین و لەیلایە
خاتو زین و زولەیخایە
خەرامان چینی ئاوایە
قەمەرنازیش لە خەتایە
هەرچەند دەکەم قسەم نایە.
٤٧
قسەم نایە بە زۆر و کەم
هاتن کوڕی قامەت عەلەم
شێرانە و مەست و موحتەرەم
زەبر بەدەست، ڕەنگین قەڵەم
چاپوک سوارن، خاوەن حەشەم
«گیو» و «فەرهاد» و «کاکەمەم»
«یوسف» و «خورشیدی یەکەم»
دەست بەخەنجەر، سگریت بە دەم
هەڵدەپەڕن شاهـ و خەدەم
نەماوە ناوی ڕۆستەم.
٤٨
ڕۆستەم و زاڵ، خاو و سستن
ئاغا و بەگلەر ڕادەوەستن
لە مەیدانا سەف دەبەستن
لەگەڵا دوژمنان سەربەستن
گرتن، خستن، کوشتن، بەستن
گوللە و خەنجەر دەپەرستن
ڕۆڵەی شێر، ئازا وو مەستن
کوردن، سەرگەرمن، دروستن
گورد و مەرد و، توند و چوستن
دەرگەی وریایی نابەستن.
٤٩
نابەستن دەرگەی دیوانان
دێن و دەچن پاڵەوانان
دەچن بۆ نا وو ناوانان
تفەنگ لە دەست و لە شانان
حیلە حیلی بەستەزمانان
نرکە نرکی شاهـ و خانان
هەروەک گۆڵەی عاسمانان
سواری ئەسپان، وەک یەکانان
سمان دەخشێنن لە بانان
قەڵتاغ دەوەستن بە ڕانان
گرشە و بڵێسەی دەبانان
هەمووی لە ساحێبقڕانان.
٥٠
ساحێبقڕان، شەست و شەشن
بەناوبانگن، دڵ بێ غەشن
جگەردارن، ساحێب بەشن
ساحێب کەماڵن، سەرکەشن
تاعوونی قەومی ڕووڕەشن
کوردن، عەگیدن، چەند گەشن
ڕاوی خۆیان دادەبەشن.
٥١
دادەبەشن ڕاوی ئاسک
نەرم و لووس و پووس و ناسک
هەڵدەماڵن قۆڵ و باسک
دایدەهێنن ڕەگ و لاسک.
٥٢
ڕەگ و لاسک دادەهێنن
تازە نەمامان دەچێنن
خوێنی دوژمن دەڕژێنن
مەحبووبەی خۆیان دەهێنن
ڕێکوپێکی نافەوتێنن
بەنا وو ناوبانگ دەمێنن.
٥٣
دەمێنن کوردی ڕوحانی
عەشایەری، هەم دیوانی
عێلی جافان و بابانی
شێر و پڵینگن لاوانی
پاڵەوانن منداڵانی
ناژمێردرێن بۆ چازانی
خێڵی کورد و هەورامانی
ئاغەسووری و سمایلانی
میکایەڵی و جاف سوڵتانی
ئەهلی پژدەر، بە هۆزانی
عەباسیی و، بابەکرانی
مامەش و مەنگوڕ، ناوانی
ئاکۆ، خۆشناو، باڵەکانی
«پاشای کۆرە»، شای جیهانی
میر مەحمەڵی و، میر وسوانی
هۆزی بنزێری و پیرانی
مەرگەیی و شاڵەبەگیانی
لەگەڵ کۆیی و ئاقارانی
بە غەفووری و حەوێزیانی
هەمووی لە مەردی مەیدانی
مەریوانی و موکریانی
سوێسنی و هیندی ئێرانی
بانە و سەقز و سەردەشتانی
قەڵاسێوکە و، سێکانیانی
بە مسکێن و شێخەکانی
شێخ بزێنی، لەگەڵ شوانی
لای کەرکوک و سلێمانی
باسی ناکرێ بە زمانی
بۆڵی و بابۆڵی و خەیلانی
سورچی و هەریری و شێخانی
زازا، بەرانبەر سۆرانی
زراری و ئاگری و بێجانی
کوڕە کوڕەی دزەییانی
وەک تایەفەی کاکەخانی
«ئەحمەد پاشا»ی ڕوتبە و شانی
برایماغایی و قەپلانی
مامەسێنی، لەگەڵ سیانی
جگە لەوان، بریفکانی
بە بەرزنجە و کەسنەزانی
ساحێبی ناوو نیشانی
تا دەگاتە لای لاجانی
حدوودی تورک و عوربانی
کوردی زەندی ئاوەدانی
جانفیداکانی کێوانی
بە قەڵەم ناکرێ بەیانی
هەموان دەناسی و دەزانی
قۆشەن قۆشەن، پیر و جوانی
دەچن بۆ ڕاو و سەیرانی.
٥٤
ڕاو و سەیران، زۆر و وازە
بەزم و خۆشی و سۆز و سازە
هەریەک بۆ ئێکێ دڵخوازە
بڵاوەی شەهێن و بازە
لە ناو چۆم و کەل و ڕازە
نووزەی تاژی و، دەنگی نازە
پێکۆڵی ئەسپی لاوازە
حودود کەوتۆتە شیرازە
زیلەی زوڕنا و نای و سازە
فیقەی دوزەلە و ئاوازە
وا دەسووتێ بەزمی تازە
وەک بەنزین و نەوت و گازە
هەرچی دوورە لەم دەروازە
بەشی هەر سیر و پیوازە
ماندووی نشێو و هەورازە
لێی بێ سندان، پێی مەنازە.
٥٥
پێی مەنازە، ئەو بەدگۆیە
پیشەی بوختان و درۆیە
ئەو بەدکاری من و تۆیە
جەوتی بە سەر، وشکەڕۆیە
ڕووڕەش و دەستە ئەژنۆیە
چی پێناکرێ خۆڵ بە دۆیە
لە ئیشی بێ جێ خەڕۆیە
هەر کەس لەگەڵ یاری خۆیە
خەریکی مەرج و گرۆیە
لە ماچ و مووچ گفتوگۆیە
گەیشتن و هاموشۆیە
خودایە نەیخەی ئەم گۆیە.
٥٦
ئەم چەرخە هەر لە سەما بێ
چرای پیر و جوان و شا بێ
یاری شیرین لە پەنا بێ
دەمت لە ناو دەمی نابێ
دەستت لە مەمکی گیرابێ
دەرگەی غەمت پێوە دابێ
خوایە بۆ ئێمەش وەها بێ
یاڕەب لێم نەگری عیتابێ
بیگرم، بیگوشم، نییە و نابێ
لێوی بمژم، دەردم چا بێ
گەزینی کوڵمەی ڕەوا بێ
یاخوا گەر شەوێکم مابێ
دڵبەر بە ئاڵ و واڵا بێ
بە غەمزە و ناز و باڵا بێ
بە باوەشمەوە دوورا بێ
ئینشائەڵڵا، دەبێ وابێ
خودایە ماڵت ئاوابێ
با بەشی حەمد و سەنا بێ.
٥٧
حەمد و سەنا بۆ یەزدانە
لە تەرەف «عەبدوڕڕەحمان»ە
ناوی ڕاجیتخلص لە شیعرانە
خزمی جافان و بابانە
لە شیرازەی کوردستانە
ئەم بەیتەی دانا بە گیانە
ناوونیشانی کوردانە
دیاریی بۆ براکانە
لێی خۆشبن گەر نقوستانە
ڕەحمەت لە باوکی هەموانە.